Nefel

[ ÇARŞEM, 2024-04-24 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Organîzatorên konferansa Brûkselê nekarîn partiyan qane bikin

» Endamên meclisa Kurdistana binxetê

KELMÎS, 31/5 2006 — Organîzatorên konferansa Brûkselê ko herdu rojên wê yên pêşiyê li bajarokê Kelmîsê yê Belçîkayê pêk hat nekarîn partiyên siyasî yên Kurdistana binxetê qane bikin da bi hev re “mecliseke wetenî” ava bikin. Du partiyên naskirî yên Kurdistana binxetê Partiya Yekîtî û Partiya Azadî beşdarî konferansê bûn lê belê di deqîqeya paşiyê de herdu partiyan got divêt serokatî ji wan be yan ne ew dê xwe jê vekişînin. Pêşniyara herdu partiyan bi piraniya dengan hat red kirin û wan jî xwe jê vekişand.

Wisa diyar e ko organîzatorên konferansê berê hesab û kitabên xwe digel partiyên siyasî baş nekiribûn û nekarîbûn armanc û daxwazên xwe baş ji partiyên siyasî re rave bikin û wan qane bikin. Organîzatorên konferansê di eslê xwe de wekî hêz ji gelek partiyên siyasî yên Kurdistana binxetê xurttir û xudankestir in lê belê nebûna tecribeya wan ya siyasî û reaksiyonên wan yên li hemberî partiyan wisa kir ko partî xwe bi wan re rehet nebînin.

Başiyeka konferansê ew bû ko nûnerên familyeyên mezin yên Kurdistana binxetê xwe dabûn ber vî barî û siyaseteka ji ya partiyên Kurdistana binxetê radîkaltir diparastin û wan bi xwe mesrefa hemî konferansê jî li xwe girtibû. Familyeya Ebas, familyeya Haco, familyeya şêxên Xiznewî, familyeya şêxên Heqî, familyeya Xeydo, familyeya Mîro û hwd her yek ji wan bi serê xwe bi qasî hinek partiyên Kurdistana binxetê xudankes in û hemî bi hev re dikarin li Kurdistana binxetê bibin hêzeka siyasî ya xurt heger xeletiyên siyasî nekin û guhê xwe jî nedin rexneyên hinek partiyên siyasî yên Kurdistana binxetê.

Piştî xelasbûna konferansê û hilbijartina endamên meclisê nûnerê Partiya Yekîtiyê Ebdulbaqî Yusivî got herçend partiya wî beşdariyê tê de neke jî ew dê piştgiriya kar û xebata vê meclisê bikin û hêviya serketinê ji wan re kir.

Di destûra vê meclisê de çend niqteyên giring hene ko ji yên partiyên siyasî yên Kurdistana binxetê pêşdetir in. Di vê destûrê de Kurdistana binxetê wekî “Kurdistana Sûriyeyê” hatiye bi nav kirin û ji bo miletê kurd jî mafê çarenivîsê û federasyon hatiye xwestin. Piraniya partiyên siyasî yên Kurdistana binxetê behsa “kurdên Sûriyeyê” dikin û behsa “Kurdistana Sûriyeyê” nakin. Herwiha piraniya partiyên siyasî behsa demokratîzekirina Sûriyeyê û mafên kulturî dikin lê belê ev destûr behsa mafê desthilata kurdan li Kurdistana Sûriyeyê û federasyonê dike.

Ji parçeyên dî yên Kurdistanê jî gelek mêvan beşdarî konferansê bûn û siyasetmedarê kurd yê bakur Şerefedîn Elçî di konferansê de got kurdên hemî parçeyan deyndarên kurdên Kurdistana binxetê ne û erka hemî parçeyan ew e ko arîkariya kurdên Kurdistana binxetê bikin.

Ji bakurê Kurdistanê serokê Hak-Parê Ebdulmelik Firat, ji DTP-ê Hasip Kaplan, ji PDK-Bakur Bayram Ayaz, ji Hevbendiyê Mûsa Kaval, ji Federasyona Kurdistanê ya Swêdê Selam Cizîrî û gelek kesên dî di konferansê de beşdar bûn û piştgiriya xwe diyar kirin.

Ji başûrê Kurdistanê jî Fewzî Etroşî (PDK), Eshed Xeylanî û ji Kurdistana Îranê Elî Qazî tevlî konferansê bûn û Fewzî Etroşî di axaftina xwe de got başûrê Kurdistanê piştgiriya Kurdistana binxetê dike û divêt kurdan li wê parçeya Kurdistanê platformeka siyasî ya mezin hebe da bikare bibe merceiyetek bo wan.