Mesûd Barzanî: Em qebûl nakin ko madeya 140-ê yek deqîqeyê jî bêt paş ve dan
» Mesûd Barzanî
HEWLÊR, 23/9 2007 — Serokê Kurdistanê Mesûd Barzanî îro di kongreya Yekîtiya Qutabiyên Kurdistanê axivî û got divêt madeya 140-ê ya destûra Iraqê di dema xwe ya diyarkirî de bêt binecih kirin û got kurd qebûl nakin ko ew made yek deqîqeyê tenê jî bêt paş ve dan.
Di heqê minaqeşeyên li ser binecihkirina madeya 140-ê de Mesûd Barzanî got:
— Berî niha kelem diketin pêşiya binecihkirina madeya 140-ê û hinek dest hebûn ko nedixweztin ev made bêt binecih kirin. Me beşdarî di destûra Iraqê de kir da mafên gelê me tê de paraztî bin. Niha komîteyeka nû ji bo binecihkirina madeya 140-ê hatiye damezirandin. Heger vê komîteyê xwest ko hinek dem jê re bihê dan da ew karên xwe bi cih bike, ew dikare vê daxwazê ji Parlamentoya Kurdistanê bike, ji ber tenê Parlamentoya Kurdistanê xwedîya mafê paşvedanê ye.
Mesûd Barzanî di heqê bajarê Kerkûkê de jî got:
— Şêx Mehmûd, Barzaniyê nemir û şoreşên kurd ji bo Kerkûkê qurbanî dane û Barzaniyê nemir mezintirîn şoreş kir qurbana Kerkûkê. Serokên mezin ji bo Kerkûkê qurban dane û em dê çawa ji bo Kerkûkê qurbanan nedin.
