Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

PKK tifaqê bi Sûriye û Îranê re dike – medyaya pro-PKK hêviyan ji Îsraîlê dike


	» Gelo Lieberman dixwaze Çiyayê Agirî yê Kurdistanê bide Ermenistanê?

WAN, 10/9 2011 — Endamê Konseya birêvebir ya KCK-ê Duran Kalkanî duhî aşkera kir ko ew ”bi rêya Sûriyeyê” jî li dijî hikûmeta AKP-ê yanî li dijî Tikriyeyê têkoşînê didin û aşkera kir ko ew li aliyê cepheya Sûriyeyê û Îranê ne. Digel vê realîteyê jî medyaya pro-PKK hêviya xwe bi ”arîkariya Îsraîlê ve” girêdide û bawer dike ko Îsraîl dê li hemberî Tirkiyeyê piştgiriya PKK-ê bike.

Li gor nûçeyeka duhî ya ANF-ê Duran Kalkan got tesîra kurdên Sûriyeyê yên di nêv PKK-ê de li ser biryarên PKK-ê nîne û behsa têkiliyên PKK-ê û Sûriyeyê kir û got Tirkiyeyê di êrişên li başûrê Kurdistanê de nemaze berê êrişên xwe da kurdên Sûriyeyê yên di nêv PKK-ê de û got:

— Lê belê bi rûdanên ko li Sûriyeyê diqewimin ve girêdayî, gelo têkiliyeka siyaseta ko em bi pêş dixin bi siyaseta me ya li dijî AKP-ê ve heye? Bêguman heye.

Duran Kalkanî got AKP li her derê dinyayê li dijî PKK-ê dixebite û hêzeka wê berfireh heye lê belê PKK jî li hemî parçeyên Kurdistanê bi îmkanên xwe li dijî AKP-ê şerê xwe berdewam dike û got:

— Lê belê bi kêmî li hemî parçeyên Kurdistanê û li derveyî welatî li her cihê ko kurd lê hebin em xwe digihînin gelê kurd bi rêya gel li dijî AKP-ê têkoşînê didin. Bi vê ve girêdayî bêguman di nêv rûdanên herî dawiyê de rewşa Sûriyeyê, têkoşîna ko heye û di nêv wê de meseleya têkoşîna ji bo çareserkirina pirsa kurdî li Sûriyeyê jî heye. Bi vê maneyê em wekî PKK li hemberî AKP-ê di nêv têkoşînê de ne.

Pratîk maneya van gotinên Duran Kalkanî ew e ko PKK digel Sûriyeyê li dijî Tirkiyeyê şerî dike û di cepheya dîktatorê Sûriyeyê Beşar Esedî û Îranê de cihê xwe girtiye.

Digel ko ev helwêsta PKK-ê ya resmî aşkera ye jî medyaya pro-pkk hêviya xwe bi tehdîdeka Îsraîlê ya li dijî Tirkiyeyê ve girêdide.

Li gor rojnameya îsraîlî Yedioth Ahronothê wezîrê derve yê Îsraîlê Avigdor Lieberman gotiye wekî helwêstekê li dijî Tirkiyeyê wan planek heye ko piştgiriya ermeniyan û PKK-ê bikin. Rojname ji devê Avigdor Lieberman dinivîsîne:

— Dibe ko Îsraîl hevkariya lobiya ermeniyan ya li Emerîkayê bike û hevkariya leşkerî jî bo serhildêrên kurd pêşniyar bike.

Rojnameya Yedioth Ahronoth behsa piştgirya Îsraîlê bo Ermenistanê dike û dibêje:

— Têt çaverê kirin Lieberman di serdana xwe ya bo Emerîkayê de ko vê heyvê dê here serkirdeyên lobiya ermeniyan bibîne dê pêşniyara hevkariya dijayetiya Tirkiyê di Kongreyê de bike. Têt gotin ko hevkariyeke wiha dê ''zerareke cidî bighîne Tirkiyeyê û dibe ko li ser nakokiya Çiyayê Agirî piştgiriya Ermenistanê jî bike.

Yanî çi? Yanî Îsraîl dê piştgiriya Ermenistanê bike da ermenî Çiyayê Agirî ji Kurdistanê veqetînin û bixin ser Ermenistanê. Hinek kurd jî keyfa xwe bi van nûçeyan tînin û pê serxweş dibin.

Hinek kurd ji xwe re çi hesaban bi Îsraîlê re dikin bila bikin lê belê çênabe ko ti caran ew li ser xusara Kurdistanê û dana parçeyeka axa Kurdistanê bo Ermenistanê be.

Di vê siyaseta Israîlê ya piştgirya Ermenistanê de qet xêra kurdan nîne. Dimîne meseleya PKK-ê ka Îsraîl dê çawa piştgiriya PKK-ê bike. Ev jî îhtimaleka pir biçûk e çimkî PKK bi xwe di nêv cepheya dijminên Îsraîlê de ye yanî di nêv cepheya Îranê û Sûriyeyê de ye.

Rojnameya Yedioth Ahronoth balê dikişîne ser piştgiriya Îsraîlê ya mihtemel bo PKK-ê û wiha dibêje:

— Herwiha di plana Lieberman de heye ko digel serkirdeyên rêxistina serhildêr ya kurd PKK-ê li Ewropayê civînan çêke. Mebesta wî digel wan hevkariyê bike û di hemî waran de heta mimkin be wan bihêz bike. Di van civînan de dibe ko kurd hevkariya wekî perwerde û çekan ji Îsraîlê bixwazin, pêngaveke wiha jî bêt avêtin dê pozîsyoneke pir mezin ya li dijî Tirkiyeyê çêbibe.

Têkiliyên Îsraîlê û Tirkiyeyê vê demê pir xerab in. Ji bo ko Tirkiyeyê aciz bike mimkin e ko Îsraîl carinan behsa piştgiriya PKK-ê bike lê belê bingehekê realîst ji hevkariya Îsraîlê û PKK-ê re nîne. Ji bo ko Îsraîl piştgiriya PKK-ê bike divêt PKK û Duran Kalkan û taxima wî pêşiyê dest ji Îranê û Sûriyeyê berdin ko hîç elametên wê xuya nakin.

-----------------------------------

Nivîskar: Nefel-Nûçe
Weşandin: 2011-09-10
Xwendin: 2687