Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Barzanî: Em ji bo referandumê destûrê ji ti kesî nastînin


	» Mesûd Barzanî

HEWLÊR, 10/7 2014 — Serokê Kurdistanê Mesûd Barzanî îro bi konsolos û nûnerên welatên biyanî yên li Kurdistanê re civiya û got kurd ji biryara referandumê paşde venagerin û li ser vê yekê ji ti kesî destûrê jî nastînin. Barzanî got pêşmerge jî ji Kerkûkê û deverên dî venakişin û xelkê wan deveran dê bi referandumê biryarê li ser mana digel Kurdistanê bide.

Di civînê de ko bi mebesta şirovekirin û ragihandina bûyer û pêşhatên vê dawiyê yên Iraqê û Kurdistanê hat saz kirin serokê Kurdistanê Mesûd Barzanî behsa rewşa siyasî û ewlehiya Iraqê û “xurtbûna terorîstan” kir û got:

— Şerê li dijî terorê pêwîstî bi hewlên hevbeş yên navdewletî heye û niha jî çekdar û terorîstan ji Reqqaya Sûriyê heta nêzîkî Bexdayê xistine bin kontrola xwe.

Li gorî daxuyaniya civînê ko li ser malpera fermî ya serokatiya Kurdistanê hatiye belav kirin, Barzanî diyar kir piştî ko artêşa Iraqê li hember DAIŞ-ê şiket Nûrî Malikî ji bo veşartina wê şikesta xwe dixwaze tohmetên bêbingeh li Kurdistanê bike û ev jî di demekî de ye ko berpirsê têkçûna rewşa Iraqê serokwezîrê Iraqê bixwe ye.

Li ser gef û tohmetên ko Malikî li Hewlêrê bar dike Barzanî têkez kir ko Hewlêr herdem cihê wan welatî û mexdûran bûye ko ji destê dîktatoriyê reviyane û niha jî nêzîkî milyonek û 200 kes reviyane Kurdistanê û got:

— Li şûna ko Malikî erkên xwe li hember vê rewşê bi cîh anîba û spasiya herêma Kurdistanê kiriba û behsa alîkariyê kiriba bi vî rengî tohmetan li herêma Kurdistanê bar dike.

Serokê Kurdistanê li ser tohmeta ko tê gotin Kurdistanê Iraq parçe kiriye got binpêkirina destûrê, siyaseta dîktatoriyê, despotîzm û piştguhxistina gelên dî Iraq perçe kiriye nek Kurdistanê, jixwe destûr bi awayekî vekirî behsa vê yekê dike ko pêbendî bi destûrê yekîtiya xaka Iraqê diparêze û rayedarên Bexdayê bi dehan caran destûr binpê kirine.

Di heqê siyaseta Kurdistanê li hember rewşa nû de jî Barzanî got piştî bûyerên Mûsilê û kirîza nû Kurdistan bi du şêwazan kar dike: ya yekê ew e ko alîkariya birayên şîe û sunnî dike da ko arîşeyên xwe çareser bikin û pêvajoya siyasî bi ser bikeve, ya dî jî rijdbûna li ser destnîşankirina mafê çarenivîsê yê gelê Kurdistanê ye û Parlamentoya Kurdistanê jî mijûlî dîtina rê û rêbazên cîbicîkirina vê yekê ye.

Mesûd Barzanî tekez kir ko ji vê biryarê paşde venagerin û gelê Kurdistanê jî ji bo diyarkirina qedera xwe ji ti kes û aliyekî destûrê nastîne.

Li ser madeya 140-ê ya destûra Iraqê û Kerkûkê jî Barzanî got hêzên pêşmerge ji bo parastina xak û gel li hember êrişên terorîstan li wan deveran hatine binecih kirin û ti carî jî venakişin.

Barzanî li ser qedera deverên Kurdistanî yên li derveyî îdareya herêma Kurdistanê got:

— Tenê qonaxa referandumê maye û em dê hurmeta ra û îradeya gelê wan deveran bigirin û em dê hewl bidin ko Kerkûk bibe sembola pêkvejiyana netewî û ayînî.

-----------------------------------

Nivîskar: Nefel-Rûdaw
Weşandin: 2014-07-10
Xwendin: 1537