Nefel

[ ÇARŞEM, 2024-04-24 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

BDP bû DBP û bakurê Kurdistanê bû herêmên demokratîk


	» Emine Ayna

ENQERE, 11/7 2014 — Parlamenterên BDP-ê berê derbasî HDP-ya tirkiyecî bûbûn. BDP-ê îro li Enqereyê kongreya xwe çêkir û navê xwe jî guhort û kir "Demokratik Bolgeler Partisi" yanî Partiya Herêmên Demokratîk.

Rêberê PKK-ê Abdullah Ocalan ji bo ko hîç ruh û bêhna kurdayetiyê ji partiyên legal yên girêdayî wî neyêt heroj navekê li wan dike û formateka nû dide wan. Li gor Ocalan BDP zêde kurdçî û herêmî yanî kurdistanî bû lewra parlamenterên BDP-ê çûn û tevlî HDP-ya çepgir û tirkiyecî bûn.

Belediyeyên di destê BDP-ê de heta niho bi navê BDP-ê xebata xwe berdewam dikirin û ev jî ne zêde bi dilê Ocalan bû. Lewra bi daxwaza Ocalan îro di kongreya BDP-ê de biryar hat dan ko navê wê bêt guhortin û bibe "Demokratik Bolgeler Partisi" yanî "Partiya Herêmên Demokratîk".

Ocalan bi zanîn naxwaze ko navê vê partiya nû bike "Partiya Herêma Demokratîk" be ji ber hingê xelk dikarin bakurê Kurdistanê wekî herêmeka yekgirtî bihesibînin. Her ji berê ve fikra Ocalan ew e ko bakurê Kurdistanê bibe pênc yan şeş "eyalet" da yekîtiyeka siyasî di nêvbera wan deveran de nebe.

Emîne Aynaya kemalîst û Kamuran Yuksek bûn hevserokên DBP-ê.

Rêberê PKK-ê Abdullah Ocalan ji kongreya DBP-ê re mesajek rêkir û got divêt DBP pirtir wekî partiyeka kadroamadekirinê kar bike û HDP dê karê siyasî yê seranserê Tirkiyeyê bike û got xebata wî ji bo "demokrasiya herêmî" ye û lewra divêt ev partî bibe partiya "herêmên demokratîk". Ocalan got rola HDP-ê jî ew e ko xizmeta "demokrasiya neteweyî" yanî demokrasiya giştî ya Tirkiyeyê bike.

Heçî Kurdistan e jixwe Ocalan û partiya wî ji zû ve fatîheyek li ser Kurdistanê xwendine û dixwazin bi hemî rengî xwe ji siyaseteka kurdistanî dûr bigirin. Lewra Ocalan di mesaja xwe ya ji bo DBP-ê de got:

— Pêwistiya çêkirina bingehekê munasib ji bo neteweya demokratîk [yanî tirkbûnê] me mecbûrî van reforman dike. Ji bo ko em ji nasyonalîzma şoven ya herdu aliyan [ya kurdan û ya tirkan] ya li Tirkiyeyê xelas bibin em dikarin bi demokrasiya herêman bigihîn modela neteweya demokratîk. Yên ko dibin sebebê cidabûnê [yanî cidabûna kurdan ji tirkan] ew kes in ko herî zêde dewleta neteweyî diparêzin. Em hem ji aliyê îdeolojîk ve û hem ji aliyê pratîkê ve nayên vê lehîstoka nasyonalîstan.

Rêberê PKK-ê Abdullah Ocalan bêjeya "demokratik ulus" yanî "neteweya demokratîk" ji bo têkbirina fikra "kurdayetiyê" û "neteweya kurd" bi kar tîne û dixwaze ko kurd hemî ji bo demokrasiya "herêman" li Tirkiyeyê kar bikin û daxwazeka siyasî bi navê hemî bakurê Kurdistanê nekin.

-----------------------------------

Nivîskar: Nefel-Nûçe
Weşandin: 2014-07-11
Xwendin: 2027