Nefel

[ PÊNCŞEM, 2024-04-18 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Barzanî Erdogan ji têkçûnê xelas kir lê belê Erdogan Barzanî ji DAIŞ-ê xelas nekir

» Davutoglu û Erdogan ji bo Barzanî ne yên roja teng bûn

STENBOL, 16/9 2014 — Serokwezîrê Tirkiyeyê Ahmet Davutoglu roja şemiyê li ofîsa xwe ya li Dolmabahçeyê li Stenbolê digel sernivîskarên medyaya Tirkiyeyê civiya û got li Rojhilata-nêvê tenê çîrokeka biserketî heye û ew jî "prosesa çareseriyê" ya li Tirkiyeyê ye.

Gerînendeyê giştî yê rojnameya Yenî Şafakê Îbrahîm Karagul duhî di nivîsareka dirêj de behsa sohbeta Ahmet Davutoglu ya digel sernivîskarên medyaya tirkî kir û gotinên Davutoglu wiha neqil kir:

— Prosesa çareseriyê meseleyeka herî giring ya 60 salên borî ye. Unsureka herî esasî ya ko dewletekê dike dewlet mefhûma hemwelatîbûnê û têgehiştina tarîxa hevbeş e ko civakê bihevvegirêdayî diparêze.

— [Me ji kurdan re got] em we wekî tehdîdeka daxilî nabînin û paşê em rûbirûyê gelek provokasyonan bûn. Dema min biryar da ko ez ji jiyana xwe ya siyasî li jiyana xwe ya akademîk vegerim ya ko hişt ez di siyasetê de berdewam bikim êrişa Daglicayê (Oremarê) bû. Piştî wê êrişê me analîzek kir ko dê şerekê nû yê tirk û kurdan çêbe. Ji aliyekî ve teror zêde dibû û ji aliyê dî ve bûyer li bakurê Iraqê diqewimîn û li hundirê Tirkiyeyê jî partiya me rûbirûya tehdîda daxistinê bû. Em ji wan rojan gehiştin îro û heger hingê me gotibûya ko Erdogan û Barzanî dê dest bi dest [li Diyarbekirê] xitabî xelkê bikin hemî kes dê li me kenîbûna. Prosesa çareseriyê ya ko em behsê dikin ev e.

Paşê jî Ahmet Davutoglu got dewletên li herêmê hemî jî tûşî problem û belayan bûne û tenê Tirkiyeyê kariye xwe ji van teşqeleyan biparêze û ew jî bi xêra "prosesa çareseriyê" ye û got:

— Li herêmê şerekê mezhebî û etnîkî yê pir kûr heye lê belê em prosesa çareseriyê pêşde dibin. Îro li Rojhilata-nêvê tenê yek çîroka biserketî heye û ew jî "prosesa çareseriyê" ya Tirkiyeyê ye. Îro li herêmê tenha hikûmeta ko bi gelê xwe re aşt e û îdîa dike ko welatekê nû ava bike hikûmeta me ye. Li Misrê, li Sûriyeyê, li Lîbyayê yan jî li Iraqê heger hikûmetên wan bi qasî me siyaseteka demokratîk û şumulî teqîb kiribûna îro ew bûyerên ko li wan deran diqewimin nediqewimîn. Li Iraqê û li Sûriyeyê kurd tên îhrac kirin lê belê li Tirkiyeyê navekê naskirî yê hereketa kurdan [Selahattin Demirtaş] bû namzetê serokkomariyê. Yanî wî got "heger ez qezenc bikim dê bibim serokkomarê hemî Tirkiyeyê" û ev pêşketineka gelek giring e. Kurdekê li Iraqê yan li Sûriyeyê nikare li vê yekê [fikra ko bibe serokkomar] bifikire jî.

Ahmet Davutoglu qebûl dike ko Tirkiye bi saya serê "prosesa çareseriyê" ji qeza û belayan hatiye parastin û tûşî belayên wekî yên li Iraqê û Sûriyeyê nebûye.

"Prosesa çareseriyê" ya li Tirkiyeyê jî di eslê xwe de berhema tifaqa di nêvbera başûrê Kurdistanê û Tirkiyeyê de ye. Berî "prosesa çareseriyê" Tirkiyeyê rêberê PKK-ê Abdullah Ocalan li girava Îmraliyê îzole kiribû û salekê nehişt ko tikes Ocalan bibîne. PKK-ê jî li Şemzînan û deverên dî şerê hikûmeta AKP-ê dikir.

Heger "prosesa çareseriyê" nebûya û têkiliyên Tirkiyeyê û başûrê Kurdistanê jî xweş nebûna bi operasyona cemaeta Gulen ya 17-ê meha 12-ê ya sala 2013-ê li hemberî AKP-ê dê hikûmeta Erdogan hilweşiya ji ber li Ewropayê û Emerîkayê jî nerazîbûneka mezin li hemberî hikûmeta Erdogan hebû.

Yanî di wê demê de heger PKK-ê jî şerê AKP-ê bikira û başûrê Kurdistanê jî destek nedaba AKP-ê niho ne Erdogan serokkomarê Tirkiyeyê bû û ne jî Davutoglu serokwezîrê Tirkiyeyê bû.

Erdogan û Davutoglu bi saya serê "prosesa çareseriyê" û piştgiriya serokê Kurdistanê Mesûd Barzanî û PKK-ê îro li Tirkiyeyê hikimdar in. Heman Erdogan dema ko DAIŞ-ê êrişî Kurdistanê kir amade bû ko li têkçûna Hewlêrê û desthilata serokê Kurdistanê Mesûd Barzanî temaşa bike û bi ti awayî arîkariya eskerî neke.

Li Tirkiyeyê ne Selahattin Demirtaş û ne jî kuredekê dikare bi rêya hilbijartinan "wekî kurd" bibe serokkomar. Îdîaya Davutoglu ko dibêje kurdekê Iraqê nikare li serokkomariyê "bifikire jî" ne rast e ji ber li Iraqê kurd ne tenê lêdifikirin lê belê di pratîkê de dibin serokkomar jî. Celal Talebanî û Fuad Mesûm wekî kurd û ji lîsteya kurdan bûn serokkomar.

-----------------------------------

Nivîskar: Nefel-Nûçe
Weşandin: 2014-09-16
Xwendin: 2361