Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Barzanî: Tirkiye li siyaseta xwe ya berê vegere em jî dê helwêsta xwe biguhorin

» Mesûd Barzanî li cepheya şerî

REBÎE, 13/10 2014 — Serokê Kurdistanê Mesûd Barzanî ji Sky Newsa erebî re got wî ji bo parastina Hewlêrê çi kiribe ji bo Kobanê jî heman tişt kiriye û got heger Tirkiye li dijî herêma Kurdistana Sûriyeyê derkeve û li siyaseta xwe ya berê vegere hingê ew jî dê helwêsta xwe li hemberî Tirkiyeyê biguhorin.

Hevpeyvîna Sky Newsa erebî digel serokê Kurdistanê bi erebî ye û 43 deqîqeyan dirêj e. Nefel beşên giring ji gotinên Mesûd Barzanî neqil dike:

— Stratejiya me ew e ko em Daişê ji hidûdê herêma Kurdistanê dûr bixin. Û heger mimkin be em dixwazin bi hevkariya hikûmeta Iraqê û xebata koalîsyona nêvdewlwtî Daişê ji hemî deveran derxin. Lê belê wezîfeya me ya esasî ew e ko em Daişê ji hidûdê herêma Kurdistanê dûr bixin.

— Dewleta ko berî hemî kesî arîkariya eskerî ji me re rêkir Îran bû. Îranê du partiyên sîlehan ji me re rêkir. Paşê Tirkiyeyê jî rêkir lê belê nexwest em em behsê bikin ji ber rehîneyên wê di destê Daişê de hebûn. Me ji Tirkiyeyê hêviya helwêsteka xurttir ji ya ko nîşanî me dan dikir. Tirkiye di biryardanê de welatekê cangiran bû. Me hêviye zêdetir sîlehan ji Tirkiyeyê dikir lê belê em dikarin wan fêm jî bikin.

— Ez Tirkiyeyê wekî welatekê dost dibînim û bawer nakim ko Tirkiye bibe rêgir li ber pêşketina herêma Kurdistanê. Ez nizanim ka helwêsta Tirkiyeyê yan dewletên dî ji bo serxwebûna Kurdistanê dê çi be lê belê têkiliyên ticarî û siyasî yên Tirkiyeyê û herêma Kurdistanê xurt in.

— Di destê me de delîlên ko nîşan bidin Tirkiye piştgiriya Daişê dike nînin. Em dibînin ko di siyaseta Tirkiyeyê de hinekê pirtûbelavî heye. Em naxwazin bibin beşek ji nakokiyên di nêvbera dewletên li herêmê û lêdixebitin ko rikeberiya wan tesîrê li me neke.

— Cihê cografî yê Kobanê rê li ber me digire ko li hawara wê biçin. Ji aliyê rojhilat, rojava û başûr ve dorpêşkirî ye û tenê menfezek heye ko diçe aliyê Tirkiyeyê. Kobanê li ber xwe dide û me zorî li Emerîkayê û hêzên koalîsyonê kir da arîkariya Kobanê bikin. Em ji bo piştgiriya wan spasiya wan dikin. Ez rastiyê ji te re bibêjim rewş bêhêvî ye û dema lêdifikirim xwîn ji dilê min têt: dema ko dibînim bajarekê kurdî hatiye dorpêç kirin û îmkan di destê me de nînin arîkariya wî bajarî bikin.

— Tirkiyeyê rê da me ko em arîkariya insanî ji Kobanê re rêkin. Me dixwest ko îmkanên me hebin û em bikarin di mideta çendseetekê de bi rêya hewayî arîkariya eskerî ji bo Kobanê bikin. Tenê rêya Tirkiyeyê heye û ez bawer nakim ko Tirkiye rê bide em hêzên xwe yên eskerî di ser axa wê re rêkin Kobanê.

— Ya ko me ji bo Hewlêrê kir me bi heman giringî û dilxwaziyê ji bo Kobanê jî kir lê belê wekî min gotî rewşa cografîk ya Kobanê rê nade me ko em zêdetir arîkariyê jê re bikin.

— Em bi temamî helwêsta Tirkiyeyê nizanin. Lê belê hidûdê xwe ji hemwelatiyên Kobanê re vekir. Kobanê hema hema bibêje ji niştecihan vala bûye. Haya min jê nîne ka Tirkiye arîkariya eskerî bi şervan û berxwedêrên Kobanê re dike yan ne. Lê belê li gor ko ez dizanim Tirkiyeyê heta niho arîkariya eskerî bi wan re nekiriye lê belê hidûdê xwe ji penaberan re vekiriye.

Gelo Tirkiye ji avabûna "herêma Kurdistana Sûriyeyê" ditirse?

— Ji bo çi Tirkiye ji avabûna herêma Kurdistanê li Sûriyeyê bitirse? Divêt Tirkiye li ti cihan li dijî bidestxistina mafên kurdan raneweste. Em ji Tirkiyeyê hêviya helwêsteka bi vî awayî dikin. Yek ji sebebên ko me têkiliyên xwe digel Tirkiyeyê baş kirin ew bû ko Tirkiyeyê siyaseta xwe li hemberî kurdan guhort û îtiraf bi hebûna doza kurdan û hebûna miletê kurd kir û xwest li Tirkiyeyê çareseriyeka siyasî ji bo doza kurdî re bibîne. Sebebên esasî yên başbûna têkiliyên me digel Tirkiyeyê ev bû û ne têkiliyên ticarî bûn.

— Heger Tirkiye li siyaseta xwe ya berê vegere û li dijî mafên miletê kurd derkeve hingê em dê helwêsteka dî li hemberî wê nîşan bidin.

— Hedefa esasî ya Daişê ew e ko li hemî cihan li herêma Kurdistanê, li Sûriyeyê, li Tirkiyeyê û li hemî cihan kurdan lawaz bike. Divêt mirov li ser bikole ka kîjan alî li pişt vê plana mezin in.

— Ebeden em dest ji referandumê bernadin. Miletê kurd bi referandumê dê biryarê bide. Niho em bi şerê Daişê ve mijûl in. Lê belê meseleya referandumê û biryara mafê çarenivîsê bi ti awayî nayêt betal kirin. Baweriya min bi serxwebûnê heye û em dê biryarê bi hêviya miletê kurd ve bihêlin ji ber miletê kurd dê biryara referandumê û mafê çarenivîsê bide.

-----------------------------------

Nivîskar: Nefel-Nûçe
Weşandin: 2014-10-13
Xwendin: 2976