Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Barzanî bo kurdên binxetê: Daiş dijmina hemî kurdan li hemî parçeyan e

» Barzanî digel kurdên binxetê civiya

DIHOK, 14/10 2014 — Serokê Kurdistanê Mesûd Barzanî îro li Dihokê digel heyeteka Encûmena Niştimanî ya Kurd li Sûriyeyê û heyeteka Tevdemê civiya û got Daiş dijmina hemî parçeyên Kurdistanê ye û cîhan jî li hawara hemî kurdan hatiye û divêt kurd vê firsetê ji destê xwe nedin.

Serokê Kurdistanbê Mesûd Barzanî di destpêka civînê de got civaka nêvdewletî li hawara hemî miletê kurd li hemî beşên Kurdistanê hatiye û got Daişê ordiya Iraqê û ya Sûriyeyê şkandiye lê belê miletê kurd bi piştgiriya hêzên hevpeyman bi serê xwe şerê Daişê dike û wê dişkêne.

Mesûd Barzanî got piştgiriya koalîsyona nêvneteweyî ji bo miletê kurd firseteka zêrîn e û got wî ji bo Hewlêrê çi kiribe ji bo Kobanê jî kiriye da Emerîka û hêzên koalîsyonê li hawara Kobanê bên û nehêlin ew bikeve destê Daişê de û got:

— Divêt em kurd yekrêziya xwe nîşanî dinyayê bidin divêt dest ji hemî nakokiyên xwe berdin û bi hev re şeref û kerameta miletê xwe û axa xwe biparêzin. Ev erka me hemiyan e û di ser hemî erkên me yên dî re ye. Ez ji we brayên xwe yên rojavayê Kurdistanê hêvî dikim ko hon bi awayekê cidî li ser çareserkirina problemên xwe yên daxilî rawestin û fikreka stratejîk ji bo paşeroja miletê me li rojavayê Kurdistanê berpê bikin da em jî bikarin bi her awayî arîkariya we bikin.

Serokê Kurdistanê Mesûd Barzanî got ew berxwedana ko miletê kurd li Kobanê dike cihê serbilindî û teqdîrê ye û ji wî de hîç ferqek i di nêvbera Hewlêrê û Kobanê de nîne û got:

— Ji bo Kobanê ya ko ji destê min hatibe min kiriye. Min ji bo parastina Hewlêrê çi kiribe ji bo Kobanê jî kiriye û hon jî dizanin ko hêzên koalîsyona nêvdewletî çawa piştgiriya Hewlêrê kirin wisa jî piştgiriya Kobanê kirin.

Serokê Partiya Demokrat ya Kurdistanê – Sûriye, Siûd Mela û siyasetmedarên kurd Tahîr Sefûk û Mihyedîn Şêx Alî û hevserokê PYD-ê Salih Mislim jî di civînê de axivîn. Hemiyan jî spasiya serokê Kurdistanê Mesûd Barzanî kir û got digel ko Barzanî serpereştiya şerê li dijî Daişê dike xema Kobanê û rojavayê Kurdistanê dixwe.

Piştî civînê hevserokê PYD-ê Salih Mislim got heyeta Tevdemê û ENKS-ê dê sibe bicivin û got komîteyên hevbeş dê bên ava kirin da bikarin li rojavayê Kurdistanê bi hev re kar bikin û got:

— Helwêsta Barzanî ji bo parastina Hewlêrê û Kobanê yek helwêst bû. Daiş ji bo dijminahiya kurdan hatiye ava kirin. Tirkiyeyê planek li hemberî herêmên kurdnişîn heye. Di civîna îro de ji me re zelal bû ko heger astengeka cografî nebûya herêma Kurdistanê dê zêdetir piştgirî bikira.

-----------------------------------

Nivîskar: Nefel-Nûçe
Weşandin: 2014-10-14
Xwendin: 1751