Nefel

[ PÊNCŞEM, 2024-04-25 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Gelek nemaye – li hêviya “Komara Kurdistanê” bin

HEWLÊR, 16/12 2014 — Enstîtuya emerîkî ya lêkolînên siyasî Gatestone di lêkolîna xwe ya herî dawîyê de dibêje li başûrê Kurdistanê demokrasî her ko diçe bihêztir dibe û her çiqasî kêmasî hebin jî divêt mirov li hêviya “Komara Kurdistanê” be!

Enstîtuya Gatestoneyê ko navenda wê ya serekî li bajarê New Yorkê li Emerîkayê ye, di lêkolîna xwe ya herî dawî de behsa rewşa kurdan û îhtimal û mercên serxwebûna Kurdistanê dike û dibêje li başûrê Kurdistanê PDK û YNK-ê berê “desthilat monopolîze kiribûn” lê belê niha mirov dibîne ko yekbûneke bihêz li wir çêbûye. Çimkî her çiqas piraniya kursiyên parlamentoyê di destê YNK û PDK-ê de bin jî lê ji bilî wan partiyan hêzên dî jî li Kurdistanê tevlî desthilatê û parlamentoyê bûne û dikarin biryaran bidin. Gatestone di rapora xwe de dibêje:

— Êdî zeftkirin û monopolîzekirina siyasetê vegeriyaye ba hikûmeteke koalîsyonê. Ev jî dikare bibe bingeha meyandina komara Kurdistanê.

Ji bo ragihandina dewleta kurdî jî kurd tenê li benda “firsendê” ne û her çiqas vê gavê hinek asteng li hember vê yekê hebin jî ew dewlet dê axirê were ava kirin û li gor raporê:

— Şerê DAIŞ-ê yek ji sedemên derengketina avakirina dewleta kurdî bû, lê belê pêşmergeyan ko di destpêka wî şerî de hinek dever ji dest dabû, niha êdî hatine ser xwe û deverên ko ketibûn destê DAIŞ-ê de rizgar kirine. Di wî şerê de balafirên şer ên hêzên hevpeyman jî alîkariya pêşmergeyan dikin.

Di raporê de behsa hêza Quds ya pasdarên Îranê û milîsên şîe yên iraqî yên girêdayî Îranê jî hatiye kirin û ev şirove li ser wê yekê hatiye kirin:

— Hêza Quds û milîsên şîe yên iraqî bûne sedema wê ko şerê DAIŞ-ê li Iraqê heta astekî ji armanca xwe dûr bikeve.

Yek ji sedemên dî yên derengketina serxwebûna Kurdistanê, Wezareta derve ya Emerîkayê ye çimkî dixwaze ko kurd ji Iraqê veneqetin û pê re bimînin, ji bo wê jî Hewlêr û Bexda li hev anî û di îmzekirina rêkeftina navbera herdu aliyan de rolek mezin lîst, vê jî serxwebûna Kurdistanê dereng xist.

Li gor raporê merc û realîteya Rojhilata Navîn nehîşt ko kurd bigihîjin xewna xwe ya dêrîn. Ji ber ko dewletên cîran qet naxwazin mafên kurdan bidin û li dijî serxwebûna Kurdistanê ne. Hêceta wan ji bo vê yekê ew e ko Kurdistanê wek hevpeymana Îsraîlê dibînin û berjewendiyên siyasî yên hundir û derve nahêle ko Kurdistan serbixwe bibe.

Enstîtuya Gatestone di wê baweriyê de ye ko êdî kurd naxwazin ereb li ser qedera wan biryarê bidin ji ber wê jî bi awayekî jîrane dixwazin ber bi serxwebûnê ve herin û xeletiyên xwe jî dubare nekin. Welatên bihêz ên cîhanê beriya niha gellek caran soz dabûn kurdan lê sozên xwe bi cîh neanîbûn.

Li ser sedemên bihêzbûna şert û mercên serxwebûna Kurdistanê jî rapor dibêje:

— Kurd bi welat û herêma xwe pir serbilind in, herêma wan herêmeke pêşketî û xwedan şaristanî ye. Ev çend sedem û serketina wan di şerê DAIŞ-ê de wisa dikin ko kurd zêdetir di mijara serxwebûna Kurdistanê de bi xwe bawer bin. Kurd ji wê yekê nerazî ne ko Bexda nahêle çekên zêdetir ji derve derbasî Kurdistanê bibin. Li Kurdistanê li her derî alaya Kurdistanê hatiye çikandin lê alaya Iraqê nayê dîtin. Zimanê kurdî li wir serdest e û zimanê erebî jî xerîb e, ev jî sedemên dî yên serxwebûna Kurdistanê ne. Ji ber wê jî Kurdistan dê di demeke kurt de ji dayîkê bibe.

-----------------------------------

Nivîskar: Nefel-Rûdaw
Weşandin: 2014-12-16
Xwendin: 2085