Nefel

[ PÊNCŞEM, 2024-04-25 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Ednan Miftî: Barzanî roleka mezin di şerî de dibîne û cîhan piştgiriyê dike


	» Ednan Miftî

HEWLÊR, 14/1 2015 — Serokê berê yê Parlamentoya Kurdistanê û endamê polîtburoya YNK-ê Ednan Miftî got serokê Kurdistanê Mesûd Barzanî di şerê li dijî Daişê de siyaseteka eskerî ya biserketî dimeşîne û cîhan jî piştgiriya wî dike.

Ednan Miftî ji kovara Gulanê re behsa şerê miletê kurd yê li dijî rêxistina Daişê kir û got:

— Biryara serokê herêma Kurdistanê ya îlankirina şerê sertaserî li dijî terorîstên Daişê biryareka di cih de bû. Barzanî di vî şerî de bi erka xwe rabû û divêt hemî xelkê Kurdistanê jî bi erka xwe rabin. Serokê herêma Kurdistanê bi xwe qumandarê hêzên çekdar yên Kurdistanê ye û erka wî ye ko di vê dema hesas de bi rola xwe rabe. Qedrê vê helwêsta wî hatiye girtin û tesîreka mezin li yekxistina pêwistiyên rûbirûbûna li hemberî dewleta ko bi navê "îslamê" şerî dike kiriye.

— Dinya jî bi rêz û qedir temaşayî xebat û rola pêşmergeyan dike, nemaze ji Zumar û Şingalê heta digihî Tilwerd, Xurmatû, Xaneqîn û Celewlayê. Ev jî dibe sebeba wê yekê ko em hemî aliyên siyasî pêk ve di şerê li dijî terorîstan de hemaheng bin. Ew biserketinên vê dawiyê yên li Şingalê û dorûbera wê cihê dilxweşiyeka mezin bûn ji ber ew biserketin piştî karesateka mezin ya ko bi ser xelkê deverê de hatibû çêbû.

Ednan Miftî got amadebûna serokê Kurdistanê li cepheyên şerî ji Şingalê heta Celewlayê moralekê mezin dide pêşmergeyan û got:

— Ez destxweşiyê li serokê herêma Kurdistanê û hemî qumandarên eskerî û hemî hêzên pêşmergeyên Kurdistanê dikim. Di heman demê de dibêjim hebûna serokê herêma Kurdistanê û qumandaran li cepheyên şerî dibe sebebê biserketinên zûtir û kêmkirina ziyanan û nemaze kêmkirina şehîdbûna pêşmergeyan.

Ednan Miftî got her ji dema hilweşandina împeretoriya osmaniyan ve dewletên desthilatdarên Kurdistanê neheqiyeka mezin li miletê kurd kirine û Kurdistan di nêvbera xwe de parçe kirine û got:

— Gelê Kurdistanê ji bo azadî û ji bo diyarkirina paşeroja xwe xebatê dike û qurbanan dide. Ji bilî kimyabaran û enfalan niho jî miletê kurd rûbirûyê terorîstên Daişê bûye û ew jî ji bo Kurdistanê xetereka gelek mezin e.

Ednan Miftî got ew kêfxweş ko serokê Kurdistanê bi erêkirina parlamentoyê pêşmerge rêkirine Kobanê da li wêderê jî axa Kurdistanê biparêzin û got:

— Erka li ser milên pêşmergeyan e ko li her cihekê Kurdistanê dema ko pêwist be bergiriyê li Kurdistanê bikin ji ber Kurdistan yek nîştiman e û li kû pêwist be em dê arîkariya wan bikin. Dema ko pêwistiya me jî pê çêbe divêt parçeyên dî yên Kurdistanê arîkariya başûr bikin.

-----------------------------------

Nivîskar: Nefel-Nûçe
Weşandin: 2015-01-14
Xwendin: 1995