Nefel

[ SÊŞEM, 2024-04-23 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Barzanî: Em kurd hovên Daişê û piştgirên wê efû nakin

» Barzanî got heta niho 800 pêşmerge şehîd bûne

HEWLÊR, 3/2 2015 — Serokê Kurdistanê Mesûd Barzanî îro ji rojnameya erebî El-Heyatê re got miletê kurd hovên Daişê û piştgirên wê ticaran ji bîr nakin û got kurd dikarin Daişê bişkênin.

Serokê Kurdistanê behsa çîroka şehîdbûna sê pêşmergeyên brayên hevdu kir û got:

— Bûyera şehîdbûna sê pêşmergeyên birayên hev di rojekê de nayê ji bîr kirin. Ez li devera Soran çûm mala wan û dayîka wan Ayşeyê pêşwazî li min kir. Dema ko hevjîn û zarokên wan şehîdan li dora min kom bûn, ez pir êşiyam.

— Ez nizanim çawa behsa wê bikim. Min ji dayîka wan şehîdan re got em hemû pê serbilind in ko tu dayîka me bî û em jî kurê te bin. Ew şehîdên milet in. Hemû şehîdên Kurdistanê kurên te ne. Dayîka wan şehîdan ji min re got: Xemê nexwe. Ev serbilindiyeke mezin e bo malbata me. Du kurên me yên dî hene, ew jî amade ne ko xwîna xwe ji bo Kurdistanê bidin.

Peyamnêrê rojnameya El-Heyatê behsa axaftina serokê Kurdistanê di heqê dayîka sê şehîdan de dike û dibêje:

— Dema ko Barzanî ev gotin digotin, hewl dida ko hêsirên wî neyên xwarê.

Serokê Kurdistanê di axaftina xwe de amaje bi helwêsta pêşmergeyekî li eniya şer dike ko dema jê re dibêjin birayê te şehîd bûye û bavê te birîndar e, ew bi telefonê ji birayê xwe yê dî re ko ew jî li eniya şer bû dibêje:

— Vaye ez li şerî me û tu digel termê birayê me here û eger bavê min jî şehîd bû wî jî veşêrin û zû vegere şerê xwe.

Barzanî behsa çîrokeka dî ya pêşmergeyan dike ko di 17-ê meha borî de qewimiye û dibêje:

— Şehîd Ehmed Mizûrî yê ko wekî Şêx Ehmo têt nas kirin palewanê vê çîrokê ye. Dema ko otomobîleke bombekirî ya Daişê nêzîkî wan dibe, wê demê Mizûrî diçe pêşiya wê otomobîlê da ko pêşiyê lêbigire, lê dema firseta wê yekê nabîne fermanê dide serbazên xwe ko dûr kevin û xwe bavêjin erdê. Di wê demê de otomobîla xwe ya leşkerî dide ber wê otomobîla bombekirî. Dema otomobîla bombekirî diteqe Şêx Ehmo şehîd dibe û hevalên wî rizgar dibin.

Serok Barzanî behsa xedarî û xembariya şerî dike û dibêje:

— Dema dilopek xwîn dirije ziyaneke mezin e. Bîne ber çavên xwe ko tu sibehê efserekî dibînî û êvarî ji te re dibêjin ew şehîd bû. Carinan ew kes bi xwe kurê şehîdekî ye yan jî neviyê şehîdekî ye.

Serokê Kurdistanê got heta niho 800 pêşmerge şehîd bûne ko 300 ji wan efserên pilebilind in û got kuştiyên Daişê bêtirî sê hezar kesî ne û got:

— Bedel pir giran e lê belê divêt were dayîn, ji ber ko em bergiriyê li hebûna miletekî û kerameta wî dikin. Herêma Kurdistanê rastî metirsiyeke mezin hatiye, lê belê bi piştrastî ez dikarim bêjim me Daiş şikênand û me nêzîkî 17 hezar kîlometre ducar ji destê wan derxist.

Serok Barzanî behsa wê yekê jî dike ko wan ji Bexdayê û çend aliyên dî re gotiye ko ew amade ne şerê jinavbirina Daişê bikin eger çekên giran bidin kurdan û got:

— Em nahêlin tişta ko çêbû, dubare bibe. Ez dixwazim bi zelalî bibêjim, em wan hovên ko serê sivîlan jê dikin û jinên êzîdî revandin efû nakin. Herwiha em wan kesan jî efû nakin ko alîkariya wan terorîstan dikin. Mebesta min ne tolhildan e, lê belê ez dixwazim dadperwerî hebe.

Mesûd Barzanî pesnê xelkê Kurdistanê jî da û got:

— Dema ko şerî destpê kir, hikûmeta Iraqê bi serokatiya serokwezîr Nûrî Malikî mûçeyê xelkê Kurdistanê birî. Digel wê jî xelkê Kurdistanê piştevaniya pêşmergeyan kir û heta nan ji wan re birin eniyên şer.

Serokê Kurdistanê got hevahengiya wan digel ordiya Iraqê baştir bûye, lê belê pêşbînî nekir ka kengê ev şer dê xelas bibe. Mesûd Barzanî got baweriya wî bi şikandina Daişê heye, herçiqas şerê Daişê ji şerê digel Sedam Hisênî zehmettir be jî.

-----------------------------------

Nivîskar: Nefel-Rûdaw
Weşandin: 2015-02-03
Xwendin: 1773