Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Murat Karayilan û KCK başûrê Kurdistanê tehdîd dikin


	» Murat Karayilan

HEWLÊR, 9/2 2015 — Berpirsê eskerî yê KCK-ê Murat Karayilan başûrê Kurdistanê bi "vekişandina gerîlayên xwe" ji cepheyên şerî tehdîd kir. Medyaya nêzîkî PKK-ê ji xelkê Kurdistanê dixwaze ko li hemberî PDK, YNK û Goranê piştgiriyê bidin PKK-ê û dest bi serhildanê bikin.

Murat Karayilan di vîdeoyeka ko duhî di medyaya nêzîkî PKK-ê (rojnews.net) de belav bûye bi zimanekê gelek hidetperest rexneyan li partiyên siyasî yên Kurdistanê û hikûmeta Kurdistanlê digire û dibêje:

— Înkarkirina [rola hebûna gerîlayên HPG-ê] nayêt qebûl kirin. Ji ber hindê jî niho rêveberiya me minaqeşe dike ka em hêzên xwe ji parastina başûr bikişînin yan nekişînin. Me ev mesele xistiye rojeva xwe. Heger rêxistinên desthilatdar û hikûmeta herêma Kurdistanê di vî warî de tişteka berçav nîşanî me nedin û vê helwêsta xwe ya nedîtinê û înkarê neguhorin dibe ko em hêzên xwe bikişînin.

Hema her piştî vê tehdîda xwe Murat Karayilan gotina xwe nerm dike û dibêje:

— Em dixwazin bizanin ka daxwaza gelê me çi ye. Em îradeya gel ji xwe re esas qebûl dikin û em dixwazin destkeftên gel biparêzin.

Murad Karayilan behsa avakirina qumandariyeka hevbeş û mecliseka eskerî ya hevbeş di nêvbera hêzên çekdar yên PKK-ê û pêşmergeyên Kurdistanê de dike û partiya xwe jî ne wekî partiyeka bakurê Kurdistanê lê belê wekî partiyeka şirîka desthilata başûrê Kurdistanê dihesibîne.

Murat Karayilan gelekê ji wê yekê aciz e ko medyaya başûrê Kurdistanê zêde behsa rola gerîlayên PKK-ê nake û qîmetê nade hebûna gerîlayan li cepheyên şerî.

KCK-ê jî duhî bi daxuyaniyeka nivîskî heman rexne li başûrê Kurdistanê girt û got qismek ji medyaya başûr PKK-ê wekî rêxistineka "terorîst" û gerîlayên PKK-ê jî wekî hêzeka "dagîrker" bi nav dikin û got başûr sîlehan nade gerîlayan û li cepheyên şerî jî rê li ber cihguhortina gerîlayan digire.

Di malpera ANF-ê ya nêzîkî PKK-ê de îro nivîsareka berfireh di heqê helwêsta PKK-ê û gotinên Murat Karayilan de belav bû. Nivîs bi îmzaya Cihan Ozgur e û ji xelkê Kurdistanê dixwaze li hemberî PDK, YNK û Goranê piştgiriyê bidin PKK-ê û îdia dike ko tenê PKK dikare başûrê Kurdistanê "azad" bike.

Nivîskar dibêje PKK dê ji niho û pê ve siyaseteka radîkal bimeşîne û balansa siyasî li başûrê Kurdistanê biguhore. Dema mirov ruhê nivîsarê dixwîne digihî wê netîceyê ko PKK dixwaze dest bi şerekî digel başûrê Kurdistanê bike.

Cihan Ozgur rexneyan li siyaseta bi îdiaya wî "durû" ya xelkê Kurdistanê jî digire û dibêje:

— Xelkê başûrê Kurdistanê ji aliyê hestan ve xwedîtiyê li PKK-ê dike û jê hez dike. Lê belê PKK ji xelkê başûrê Kurdistanê ji xwedîtiya hestan zêdetir hêviyan dike. Ji hejêkirin û sempatiyê zêdetir çi heye? Bo nimûne xelk dikare li hemberî siyaseta înkarê ya li dijî PKK-ê nerazîbûna xwe ya demokratîk nîşan bide.

Li gor nivîskarî hikûmeta koalîsyonê ya di nêvbera PDK, YNK û Goranê de jî ne baş e û dibe sebebê ko hersê partî li hev bikin û nebin rikeberên hevdu û dibêje:

— Bo nimûne Goranê û PDK-ê yan jî PDK-ê û YNK-ê dikarîn bi serê xwe hikûmetê ava bikin lê belê hersê bi hev re li ser desthilatê ne. Hebûna Qubad Talebanî wekî cihgirê serokwezîr rê li ber mixalefeteka mihtemel girt û hersê partî bi hev re rê li ber alternatîvên dî jî digirin.

Cihan Ozgur îdia dike heger PKK bi serê xwe li başûr bikeve hilbijartinan dê bibe partiya yekê û di heqê gotinên Murat Karayilan de jî dibêje:

— Daxuyaniya Murat Karayilan nîşan dide ko li başûrê Kurdistanê siyaset dê germ bibe. PKK hêdî balansa ko li başûrê Kurdistanê heye qebûl nake. Ji ber hindê jî qîmetê dide helwêsta xelkê. Divêt em li wê hêviyê bin ko ji niho û pê ve siyaseta PKK-ê ya li başûrê Kurdistanê dê ji berê radîkaltir bibe. Ev rewşeka gelek muhim û nû ye. Dikare ji bo başûrê Kurdistanê bibe destpêka şoreşeka civakî. Îhtimala "Bihara başûr" heye.

Di dawiya nivîsara xwe de Cihan Ozgur behsa îhtimalên heyî dike û dibêje:

— Piştî van daxuyaniyên Murat Karayilan divêt mirov bi çavekê diqettir li rûdanên ko dê li başûr çêbin temaşa bike. Di rewşekê de ko li rojavayê Kurdistanê demokrasî pêşdikeve û bakurê Kurdistanê jî nêzîkî şoreşê bûye ne mimkin e ko başûrê Kurdistanê ji vê yekê muteesir nebe. Em dê rawestin û bibînin ka xelkê başûr dê xwe vehejînin û ji vê zulma heyî re bibêjin bes e û hişyar bibin yan ne.

Yanî li gor gotinên Murat Karayilan, daxuyaniya KCK-ê û nivîsara Cihan Ozgur ya di ANF-ê de PKK dê li başûrê Kurdistanê teşebisa pêkanîna serhildanekê li hemberî hêzên siyasî û hikûmeta Kurdistanê bike.

-----------------------------------

Nivîskar: Nefel-Nûçe
Weşandin: 2015-02-09
Xwendin: 2202