Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Barzanî ji bo jinûveavakirina Kobanê bangî miletê kurd kir

» Barzanî got bila kurd nîşan bidin ko hevxemên hevdu ne

HEWLÊR, 6/3 2015 — Serokê Kurdistanê Mesûd Barzanî îro bi daxuyaniyeka nivîskî bangî hemî miletê kurd li herçar parçeyên Kurdistanê û li diyasporayê kir ko li hawara xelkê Kobanê biçin da Kobanê ji bo jiyaneka xweş ji nû ve bêt ava kirin.

Teksta banga serokê Kurdistanê Mesûd Barzanî li jêrê ye:

***

Bi navê Xwedayê mezin û dilovan
Cemawerê serbilind yê Kurdistanê

Bi sayeya xweragirî û qehremaniya şervanan û hêza piştevaniyê ya pêşmergeyan, Kobanê xwe ragirt û neket û terorîstên dagîrker tûşî şikesteka mezin bûn û Kobanê bi ser ket. Di encama êrîşa zalimane ya terorîstên Daişê ya li ser Kobanêya qehreman hejmareka zêde xuşk û birayên me yên li wî bajarê ezîz koçber bûn û mal û halê xwe bi cîh hiştin û ji ber şerî û dirindeyî û wehşîgeriya terorîstan piraniya Kobanê hat wêran kirin.

Terorîstan niyet hebû bi têkdan û wêrankirina bajarî dawiyê li hebûna kurdan û jiyana li vî bajarî bînin, lê belê Kurdistanê bi xweragirî û cangoriyên xwe rê neda ko ew plana terorîstan pêkbêt. Piştî azadbûna vî bajarî pêwîst e jiyan ji nû ve li Kobanê destpê bike û bajar bêt ava kirin da xuşk û birayên me bi serbilindî vegerin bajarên xwe.

Arîkarîkirin û pêşkêşkirina yarmetiyê ji bo avakirina Kobanê û destpêkirina jinûvejiyanê li vî bajarî erkeka neteweyî û nîştimanî ya me hemiyan e. Daxwazê ji hemî kurdistaniyên ezîz yên li hûndir û derveyê welatî û rêxistinên civaka medenî û sazî û dezgehên ragihandinê û saziyên xêrxwaziyê û xelkê xêrxwaz û dam û dezgehên fermî yên herêma Kurdistanê dikim ko her kes li gor şiyana xwe di hawara komkirina arîkariyê ji bo avakirina Kobanê de beşdar bibin.

Çawa di dema êrîşa terorîstan de em hemî bi dil û bi can digel Kobanê bûn û çûna pêşmergeyan bo Kobanê hêmaya yekdengî û hevsoziya neteweyî bû, pêwîst e niha jî di qonaxa binyatdanîna jiyan û avakirinê de bi hemî şiyana xwe digel Kobanê bîn û bila ev peyama bihêz bigihe hemî cîhanê da bizanin gelê kurd xwediyê yek doza hevbeş e û di xweşî û nexweşiyan de yekdeng û yekgirtî ne.

Mesûd Barzanî
Serokê Herêma Kurdistanê
6/3 2015

-----------------------------------

Nivîskar: Nefel-Nûçe
Weşandin: 2015-03-06
Xwendin: 1425