Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Dozgirê tirkan partiya kurdan bi nijadperestiyê tawanbar kir

» Serokê Pakê Mustafa Ozçelik got ew programa partiya xwe naguhorin

DIYARBEKIR, 10/3 2015 — Serdozgirê Yargitaya dewleta tirkan îxtarnameyeka dirêj ji Partiya Azadiya Kurdistanê re rêkir û got zûka navê xwe bikin tirkî û behsa "kurd", "kurdî" û "Kurdistanê" nekin ji ber ew hemî nîşanên "nijadperestî" û parçekirina yekîtiya ax û miletê tirk e.

Serdozgir Hasan Erbil di îxtarnameya xwe de ko 11-ê meha didoyê îmza kiriye û paşê ji Partiya Azadiya Kurdistanê re rêkiriye dibêje heger hon guhortinên pêwist nekin dê li cem Dadgeha Qanûna Esasî giliyê bikim da partiya we bêt girtin.

Serdozgirî hema-hema bibêje ti madeyên program û rêbaza daxilî ya Partiya Azadiya Kurdistanê minasib nedîtine û dibêje ew li dijî qanûna esasî ya Tirkiyeyê û li dijî qanûna partiyên siyasî yên Tirkiyeyê ye.

Li gor madeya sêyê ya qanûna esasî ya Tirkiyeyê: "Dewleta tirkan bi welat û miletê xwe ve parçenebar e. Zimanê wê tirkî ye. Formê alaya wê bi qanûnekê hatiye diyar kirin û alaya sor ya digel heyv û stêrê ye. Sirûda wê ya neteweyî "Istiklal marşi" ye. Paytextê wê Enqere ye."

Li gor qanûna partiyên siyasî yên Tirkiyeyê ya jimare 2820 û benda 81/b partiyên siyasî çênabe ko: "Ji bilî parastina zimanê tirkî û kultura tirkî daxwaza parastina zimanekê dî yan kultureka dî bikin, pêşde bibin yan jî belav bikin û li ser axa welatê Komara Tirkiyeyê bi avakirina mînorîteyan bibin sebebê têkbirina yekîtiya miletî û di vî warî de xebatê bikin."

Dozgir xwe dispêre van herdu qanûnan û hema-hema bibêje hemî programa Partiya Azadiya Kurdistanê daye ber kêr û biviran. Dozgir dibêje hema navê partiyê (Partiya Azadiya Kurdistanê) bi xwe ne tirkî ye û ev jî dibe sebebê çêkirina mînorîteyekê li ser axa Komara Tirkiyeyê û yekîtiya neteweyî ya "tirkan" têkdibe. Yanî dema ko kurd bibêjin ew "kurd" in dibin sebebê parçekirina yekîtiya neteweyî ya "tirkan".

Pak di rêbaza xwe ya daxilî de dibêje ew partiya hemî "kurdan" û neteweyên dî yên ko li "Kurdistanê" dijîn e. Dozgirê tirkan vê jî wekî sebebekê parçekirina "ax û neteweya tirkan" dibîne û wekî "nijadperestî" bi nav dike. Yanî dema ko miletên dî yên ji bilî tirkan li bakurê Kurdistanê yan li Tirkiyeyê doza mafê hebûna xwe bikin dibin "nijadperest" lê belê heger xwe înkar bikin û bibêjin ew "tirk" in hingê li gor qanûnên tirkan in û ne nijadperest in.

Îxtarnameya serdozgirê tirk Hasan Erbîl ji 12 rûperan pêk têt û di hemî rûperan de ew bi dehan caran Partiya Azadiya Kurdistanê bi "nijadperestiyê" û çêkirina mînorîteyekê li ser axa Tirkiyeyê tawanbar dike.

Hasan Erbil di dawiya nameya xwe de ji berpirsên Pakê re dibêje heger hon van madeyan neguhorin ew dê li cem Dadgeha Qanûna Esasî dozê li hemberî partiya wan veke.

Serokê Partiya Azadiya Kurdistanê Mustafa Ozçelik îro li Diyarbekirê di preskonferansekê de rexne li îxtarnameya serdozgirê tirk girt û got serdozgir Hasan Erbil vê cesaretê ji siyaseta xelet ya dewlet û hikûmeta Tirkiyeyê digire û got prosesa çareseriyê jî heta ko ev qanûnên Tirkiyeyê hebin bi ser nakeve.

Mustafa Ozçelik got ew program û rêbaza daxilî ya partiya xwe naguhorin û bila dewleta tirkan qanûnên xwe biguhore.

-----------------------------------

Nivîskar: Nefel-Nûçe
Weşandin: 2015-03-10
Xwendin: 1966