Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Bêhuzûriya di nêv Ak Partiyê de mezin dibe


	» Arinç ji "bêheysiyetiya" Gokçek aciz bû

DIYARBEKIR, 24/3 2015 — Serokkomarê Tirkiyeyê Recep Tayyip Erdogan roja newrozê di balafirê de dema ko ji Ukraynayê vedigeriya ji medyaya tirkî re got ew ne digel civîna heyeta hikûmeta Ak Paertiyê û heyeta HDP-ê ya li qesra Dolmabahçeyê (28/2) ye û nerazîbûna xwe li hemberî dehmadeyên herdu aliyan nîşan da.

Li gor rojnameya Milliyetê (22/3), Recep Tayyip Erdogan got ew li dijî perwerdeya zimanê kurdî di dibistanên dewletê de ye û got ew ne digel civîna hikûmetê û Ak Partiyê ye jî û got:

— Ez wê civîna li wêderê minasib nabînim. Ji ber di wê civînê de arîkarê serokwezîrê hikûmetê û grupeka di parlamentoyê de li tenişta hevdu rûniştin û ev ne rast bû. Berê dema ko pêwist bûya hevalekî me digel wan diciviya û paşê daxuyaniyek dida. Lê belê wekî di wê civînê de dernediketin pêşberî medyayê û du metnên cida îlan nedikirin. Berê tişteka wiha çênebûye û ez vê rast nabînim. Heçî meseleya wan deh madeyên ko hatine aşkerakirin e di metna wê de bangeka demokrasiyê nîne. Ez bi navê demokrasiyê kûdera vê metnê qebûl bikim?

Erdogan diyar kir ko ew li dijî avakirna "Heyeteka Çavdêr" e jî û got hertiştê ko hikûmet dike haya wî jê nîne. Piştî van gotinên Erdogan, Bulent Arinçê arîkarê serokwezîr Ahmet Davutoglu jî derket û got ne baş e ko Erdogan xwe tevlî hertiştî dike û got li Tirkiyeyê hikûmetek heye û hikûmet berpirsa van karan e.

Serokê belediyeya Enqereyê Melih Gokçek jî derket û got Bulent Arinç zelamê Cemaeta Fethullah Gulen e û got bila Bulent Arinç îstifa bike ji ber ew bûye belaya serê Ak Partiyê.

Bulent Arinç ji van gotinên Melih Gokçek bêhed zêde aciz bû û duhî derket pêşberî medyayê û di preskonferansekê de got Melih Gokçek "bêedeb" e û hewqasê "heysiyet" pê re nîne ko bikare doza îstifayê lê bike û got:

— Gokçek di heqê min de hinek tweet nivîsîne. Ew daxuyaniyeka bêedeb bû. Min li mal de ji hevalên xwe pirsî ka bersiveka çawa bidimê. Ji min re gotin wî zelam nehesibîne, tu kî yî û ew kî ye. Gokçek ne mirovekê hewqasê xudanheysiyet e ko bikare daxwaza destjikarkişandinê li min bike. Evîneka min heye û ew evîn ne mirovxapandin e, ne evîna kursiyan e, ne evîna meqaman e, ne berjewendiyên madî ne, wekî hinan. Ez li vêderê zelamê dozekê me. Min ji bo wê dozê temenê xwe feda kir. Min ji bo xizmeta welatê xwe û miletê xwe gelek wezîfe li xwe girtin.

Paşê jî Bulent Arinç got serokê belediyeya Enqereyê Melih Gokçek ji bo ko kurê xwe bike parlamenter "şelafiyê" ji hinekan re dike û got Gokçek ji bo ko bibe serokê belediyeya Enqereyê jî di dema xwe de gelek arîkariya cemaeta Fethullah Gulen kiriye û got Gokçek ne mirovekê şerefmend e.

Rojnamevanê tirk Abdulkadir Selvî ko di rojnameya Yeni Şafakê de dinivîsîne û piştgiriya Bulent Arinç dike duhî di nivîsara xwe de got "sihra Ak Partiyê" ya hemahengiya di nêvbera rêberên wê de têkçû û got hêdî zehmet e ko Ak Parti wekî berê yekîtiya xwe biparêze.

Hevserokê HDP-ê Selahattin Demirtaş jî kêfxweşiya xwe ji bo vê krîza di nêv Ak Partiyê de derketî diyar kir û îro got Erdogan ti proje ji bo çareserkirina pirsa kurdî nînin.

-----------------------------------

Nivîskar: Nefel-Nûçe
Weşandin: 2015-03-24
Xwendin: 2273