Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Mîranî: Em hêvî dikin ko HDP cardî bi ser keve

» Heyeta PDK-ê serdana merkeza HDP-ê kir

ENQERE, 13/9 2015 — Sekreterê polîtbîroya PDK-ê îro li merkeza HDP-ê li Enqereyê got ew dixwazin ko HDP di hilbijartinên bên de jî barajê derbas bike û got xwîn nabe av û her li kû be ew piştgiriya kurdan û hêzên kurdî dikin.

Fazil Mîranî got bi şerî tiştek safî nabe û divêt diyalog di nêvbera HDP-ê û AK Partiyê de hebe û ew piştgiriya koalîsyona AK Partî û HDP-ê dikin û got:

— Piştî hilbijartinên heftê hezîranê min nedixwest ko HDP zû bibêje ko nakeve hikûmetê. Me digot heger hikûmeteka ava bibe û HDP jî tê de be dê bibe garantiya prosesa aştiyê.

Fazil Mîranî got PKK li Qendîlê bi rengekî siyasetê dike û divêt rengê ko HDP pê siyasetê dike cida be û got:

— Siyaset tifengê bi rê ve bibe baştir e ji wê yekê ko tifeng siyasetê bi rê ve bibe. Eqlê siyasetê mentiq e û eqlê tifengê quwet e. Quwet ji siyasetê re lazim e lê belê çênabe ko quwet siyasetê bi rê ve bibe. Em dixwazin ko xebata çekdarî ji xebata demokratîk bêt cida kirin. Xebata braderên me yên li Qendîlê rûyekî xebatê ye. Lê belê hebûna 80 parlamenterên kurd li parlamentoyê li welatekî Tirkiyeyê giring e.

Fazil Mîranî got ew dixwazin ko li Tirkiyeyê "aştiyeka millî" bêt çêkirin û nebe şerê HDP-ê û AK Partiyê yan şerê kurdan û tirkan û di vê rewşê de jî hilbijartin nayêt kirin û got:

— Peyama me ji bo brayên me yên HDP-ê ew e, me ji AK Partiyê re jî gotiye û dê sibe ji CHP-ê re jî bibîjin: Me ji wan re got hon nikarin bi vê krîza heyî bibêjin ko hon tişteka baş yan biserketî dikin. Xirabkirin hêsanî ye lê belê avakirin zehmet e. Digel nakokiyên siyasî divêt hon hemî bi hev re ewlekariya sivîl biparêzin.

Sekreterê polîtbîroya PDK-ê FAzim Mîranî behsa soz û ehda di nêvbera miletê kurd de kir û got:

— Hîç cidahiyeka siyasî nikare "soza miletîniyê" têkbibe. Kurd dibêjin "xwîn nabe av". Em wekî Partiya Demokrat ya Kurdistanê bêguman li her cihekî piştgiriya mafên miletê xwe dikin. Hîç berjewendiyek [ya nêvdewletî] û hîç rewşek nikare vê hestê ji me bistîne û em li ser vê rêyê hatine perwerde kirin. Dostaniya me ya digel vî terefî yan wî terefî, têkiliyên digel Tirkiyeyê, Îranê û Sûriyeyê cida ye lê belê dostayetiya me ya mezin digel miletê me ye. Emerîkayê û Tirkiyeyê gelek zorî li Mesûd Barzanî kir lê belê Barzanî got dinya jî xirabibe em nabêjin PKK terorîst e.

Fazil Mîranî got dibe ko ew bi gotin zêde behsê nakin lê belê ji bo kurdên li parçeyên dî ya ko ji wan hatiye kirine û dikin û got:

— Em ji bo miletê xwe dikin û minetê jî li kesî nakin. Hinek braderan behsa PYD-ê kir. Ez li Zumar û Şingalê şeş heyîvan li cepheyî bûm. Ya ko min bo PYD-ê kirî hemî Iraq nikare bike. Me top dan wan, me tifeng dan wan, me fîşek dan wan lê belê me dengê xwe nekir. Hon dilrehet bin ko di meseleyên esasî de em piştgirên hevdu ne. Ereb dibêjin "ne lazim e hertişta ko mirov bizane bibêje û hertişta têt gotin jî ne şert e ko rast be".

Berpirsê HDP-ê Nazmî Gur jî di hevdîtinê de pêşwaziyeka germ li heyeta PDK-ê kir û got ew di heqê boçûn û gotinên Fazil Mîranî de hemfikir e.

Heyeta PDK-ê ji Fazil Mîranî, Ehmed Kanî, Hêmin Hewramî û Sefîn Dizeyî pêkdihat. Ji ber ko hevserokê HDP-ê Selahattin Demirtaş li bakurê Kurdistanê bû nekarî beşdarî civîna digel heyeta PDK-ê bibe.

-----------------------------------

Nivîskar: Nefel-Nûçe
Weşandin: 2015-09-13
Xwendin: 3956