Nefel

[ ŞEMÎ, 2024-04-20 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Qumandarê hêzên hewayî yên tirkan: Em îro di nêv şerî de ne

» Orgeneral Abidin Unal: Me li 1200 hedefên PKK-ê da

DIYARBEKIR, 6/10 2015 — Qumandarê hêzên hewayî yên tirkan orgeneral Abîdîn Unal îro li Diyarbekirê got hêzên hewayî yên tirkan di eslê xwe de îro di nêv şerî de ne û ji 23-yê tîrmehê ve du hezar caran li hedefên PKK-ê yên li başûrê Kurdistanê dane. Siyasetmedarê tirk yê CHP-ê Mehemet Bekaroglu dibêje xetera şerê nêvxweyî li Tirkiyeyê heye.

Li gor rojnameya Yenî Şafakê, orgeneral Abîdîn Unal li Diyarbekirê serdana qerargaha balafirên şerî yên tirkan kir û got:

— Di eslê xwe de Hêzên Çekdar yên Tirkan îro şerî dikin. Ji şerekê navincî zêdetir jî li du cepheyan şerî dikin. Bi kurtî me ji 23-yê tîrmehê heta niho zêdetirî 2000 teqemenî [yanî bomba] bi kar anîne û me li zêdetirî 1200 hedefan daye. Ya ko ez dixwazim bi taybetî behsê bikim gelo kê 1200 yan jî 1500 hedef tesbît kirin? Bi îstixbaratê, bi keşf û çavdêriyê muxaberata me û analîstên me ew hedef tesbît kirin. Ji wan 2000 teqemeniyên ko me avêtin yek tenê jî vala neçû.

Orgeneral Abîdîn Unal got ev şer nîşana biserketina çekdarên wan û efserên wan e û got:

— Hemî balafirên me yên ko pêwistî pê hebû li asîmanan sotemeniya pêwist werdigirin. Hemî şervanên me profesyonel kar dikin. Yanî 2000 bomba bi temamî hem jî di nîvê şevê de li hedefên xwe ketin. Ev nîşana biserketina pîlotên me ye. Nexwe em bi firandina balafiran, bi pîlotan, bi efseran û bi jêrefseran karekê pir hemaheng dikin. Yanî hemî kes şerî dikin û bi awayekê profesyonel hêza me ya hewayî pêktînin.

Tirkiye ji aliyekî ve li başûrê Kurdistanê heroj êrişî bingehên PKK-ê dike û ji aliyê dî ve jî li bakurê Kurdistanê bi polîsan, cendirmeyan û heta bi tankên eskerî êrişî bajarên wekî Cizîrê, Şirnexê, Şemzînanê, Colemêrgê, Nisêbînê, Farqînê, Bismilê û cihên dî dike û jiyanê li miletê kurd dike cehenem û nahêle kes ji mala xwe derkeve.

Hêzên çekdar yên tirkan hebûna hinek ciwanên çekdar yên PKK-ê li hinek taxên bajarên Kurdistanê dikin hêcet û bi rojan bajaran dorpêç dikin û nahêlin xelk ji malên xwe derkevin.

Ev şerê ko îro li Tikriyeyê û bakurê Kurdistanê heye ji qalibê "têkoşîna li dijî terorê" derketiye û bûye şerek di nêvbera dewleta tirkan û miletê kurd de. Her roja ko derbas dibe kîn û nefreta di nêvbera miletê kurd û tirkan de zêdetir dibe û hinek tirk bi xwe jî behsa xetera şerê nêvxweyî dikin.

Siyasetmedarê tirk Mehmet Bekaroglu ko berê nêzîkî AKP-ê bû û niho wekî arîkarê serokê CHP-ê Kemal Kiliçdaroglu kar dike îro ji rojnameya tirkî Zamanê re behsa xetera şerê nêvxweyî kir û got:

— Bi dehan sal in ko ez çavdêriya herêmê dikim, min serdana Iraqê û Sûriyeyê kiriye û bi kûrî û ji nêzîk ve dizanim ka xelkê Iraqê û Sûriyeyê xudanê çi hestan in û lewra ji bo Tirkiyeyê endîşeya min heye. Endîşeya min heye ko şerê nêvxweyî çêbe. Tirkiye nikare tehemila vê rikeberiya [ko Erdogan di nêvbera kurd û tirkan de] afirandiye bike. Ne mumkin e ko Tirkiye bikare vê siyaseta xwe berdewam bike. Siyaseta AKP-ê û nemaze ya rêzdar serokkomar [Erdogan] Tirkiye gehand vê qunaxê. Wî wisa kir ko hemî şerên li welatên Rojhilata-nêvê neqlî Tirkiyeyê bibin.

Mehmet Bekaroglu got serokkomar Erdogan berî hilbijartinên heftê hezîranê "jehr" xist hilbijartinan û piştî hilbijartinan jî jehr xist nêv siyasetê da hikûmeta koalîsyonê çênebe û zerer da xwe jî, da Tirkiyeyê jî û da AKP-ê jî û got:

— Erdogan behsa terorê dike. Bêguman ez nabêjim ko serokkomar şer da destpê kirin. Lê belê gelek keda wî di çêbûna vê rewşê de heye. Tayyip Erdogan hêdî ji bo aştiya nêvxweyî ya Tirkiyeyê jî xeter e.

-----------------------------------

Nivîskar: Nefel-Nûçe
Weşandin: 2015-10-06
Xwendin: 3158