Nefel

[ ÇARŞEM, 2024-04-24 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Demîrtaş: YPG dê derbasî wî aliyê Firatê bibe û Davutoglu dê zîq temaşa bike

» Demîrtaş serokwezîrê tirkan Davutoglu bêminet kir

DIYARBEKIR, 29/10 2015 — Hevserokê HDP-ê Selahatttin Demîrtaş duhî bi awayekê dijwar bersiva serokwezîrê tirkan Ahmet Davutoglu da û got YPG dê derbasî aliyê rojavayê çemê Firatê bibe û Davutoglu jî dê tenê zîq lê temaşa bike.

Selahattîn Demîrtaş got dema ko Daiş li devera Cerablusê be Davutoglu dengê xwe nake lê belê dema ko kurd û PYD derbasî wêderê bibin Davutoglu tehdîd dike û got:

— Davutoglu derketiye û li xwe mikur têt û dibêje "me du caran li YPG-ê da". Dibêjin heger YPG derbasî aliyê dî yê çemê Firatê bibe ew dê lêbidin. Daiş li Cerablusê ye û hon lênadin. Hon hêjî ji Daişê re nabêjin "rêxistina terorê" lê belê derdikevin û ji PYD-ê re dibêjin "rêxistina terorê". Tew dibêje çênabe ko YPG derbasî wî aliyê Firatê bibe. Ho Davutoglu, ez ji te re dibêjim, YPG dê derbasî wî aliyê çemê Firatê bibe û tu jî dê zîq lê temaşa bikî!

Selahattîn Demîrtaş behsa rola miletê kurd li hemî parçeyên Kurdistanê kir û got tirk mecbûr in di bin alaya rengîn ya Kurdistanê de kontraktan digel hikûmeta başûrê Kurdistanê jî îmza bikin û got:

— Demên tarîxî hene. Rojhilata-nêvê ne ya sedsal berê ye. Heger birêvebirên [Tirkiyeyê] xwe ji tirsa kurdan rizgar bikin em dikarin li Sûriyeyê hêza xwe bikin yek. Paşeroja Tirkiyeyê di destê HDP-ê de ye. Heger hon bixwazin ko tesîreka we li Sûriyeyê hebe divêt hon dijminahiya kurdan nekin. Çênabe ko hon ji nûnerên ko gel temsîl dikin re bibêjin "rêxistina terorê". PYD nûnera gel e. Partî îro hene û sibe nînin lê belê gel hertim hene. PYD, PKK û HDP dikarin bên guhortin û veguhortin lê belê gelê kurd dê her hebe. Gelê kurd kê wekî pêşengê xwe bibîne divêt tu wekî dewlet rêzê jê re bigirî.

— Ji bo herêma federal ya kurdan ya li başûr jî bi salan beredayî axaftin. Bi salan çîrokên beredayî di heqê başûr de jî xwendin. Niho di bin alaya rengîn de kontraktên ticaretê îmza dikin. Kaxezên ko alaya Kurdistanê li ser hatine neqişandin îmza dikin. Siyaseta wan [ya AKP-ê] wiha ye. Deh milyon dolar hebe peymanên yekalî îmza dikin. Tirkiye bi vî rengî li ser lingan dimîne.

Paşê jî Selahattîn Demîrtaş behsa pozîsyona lawaz ya Tirkiyeyê û hikûmeta AKP-ê kir û got:

— Ew texmîn dikin ko ew Rojhilata-nêvê bi rê ve dibin. Camêr [Davutoglu] nizane guhdar jî be. Camêrê me fêr nebûye ko guhdar be û tenê diaxive. Mirov jê bipirse û bibêje ho Davutoglu, tu çawa yî dê destpê bike û behsa tarîxê bike. Divêt tu bizanî ko kolaneyên Til-Ebyedê û tenefûskirina hewayê wê cuda ye. Tu hîç tiştekî nizanî. Di vê sedsalê de divêt tu destê xwe bidî destê kurdan. Davutoglu hêjî dibêje ko du caran li PYD-ê dane û dê cardî lêbidin. Kitêba wî stûr e lê belê nêveroka wê vala ye. Xwedê hez ke em firsetê nadin we ko hon koalîsyonê jî ava bikin. Xwedê hez ke di van hilbijartinan de em dê bibin partiya didoyê yan sêyê û tu jî dê rehet bibî û yê li qesrê [Erdogan] jî dê rehet bibe.

Serokwezîrê tirkan Ahmet Davutoglu duhî gelek ji van gotinên Selahattîn Demîrtaş aciz bû û got:

— Yê ko divêt şerm bike Demîrtaş e. Yê ko divêt şerm bike ew Demîrtaş e ko niho jî PKK-ya ko kiryarên terorîstî dike diparêze. Min li hîç cihekî çavê xwe ji wê yekê re negirtiye ko Daişê me’zûr bibînim û negotiye bila li dijî Daişê operasyon neyêt kirin. Erê rast e ko em li Daişê jî û li PKK-ê jî didin. Ko lazim be em dê li YPG-ê jî bidin. Birîna Demîrtaş heye û dixwere. Em nahêlin ko PYD derbasî rojavayê Firatê bibe. Emê temaşa bikin ka çi li PYD-ya li rojhilatê Firatê ye jî bikin. Em rênadin ko ew li aliyê rojhilatê jî xebateka ko zererê bide Tirkiyeyê bikin. Kî li ser tixûbê Tirkiyeyê bijî divêt dostê Tirkiyeyê be û yê ko dijminahiyê bike em mafê jiyanê nadinê. Hezkê bila kampên PKK-ê li bakurê Iraqê bin û hezkê bila kampên YPG/PYD-ê yan jî kantonên wan li Sûriyeyê bin. Yan jî hinek hêzên dî bin. Em mafê jiyanê nadin hîç unsureka ko dijmina Tirkiyeyê be.

-----------------------------------

Nivîskar: Nefel-Nûçe
Weşandin: 2015-10-28
Xwendin: 4205