Nefel

[ PÊNCŞEM, 2024-04-25 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NIVÎSAR

Di destê Leyla Zanayê de “Asayê Mûsa” nîne


	» Leyla Zana

DIYARBEKIR, 29/1 2014 — Serokê BDP-ê Selahattin Demirtaş îro ji rojnameya tirkî Milliyetê re got divêt serokê Kurdistanê Mesûd Barzanî rexneyan li siyaseta xelet ya AKP-ê bigire û got divêt Barzanî piştgiriya PYD-ê jî bike.

Rojnamevana Milliyetê, Serpil Çevikcan di nivîsara xwe ya îro de behsa sohbeteka xwe ya digel Selahattin Demirtaş dike û di vê sohbetê de Demirtaş hem behsa serdana Leyla Zanayê bo rêberê PKK-ê Abdullah Ocalan û hem jî behsa siyaseta serokê Kurdistanê Mesûd Barzanî dike.

Di heqê serdana Leyla Zanayê de Selahattin Demirtaş dibêje:

— Ev demekê dirêj e ko me dixwest ji bilî heyetên rutînî hinek heyetên dî jî biçin Îmraliyê. Leyla Zanayê jî jiyana xwe daye vî karî, hevaleka me ya sembol e. Çûna wê ya giravê dikare bibe sembolek ji bo çûna hinek kesên dî jî. Yan ne rojeveka siyasî ya wê ya cida nîne. Ew jî beşek ji prosesê ye. Daxwaza me ew bû ko divêt heyetên dî jî biçin, ev bû tecribeya yekê. Di hevdîtinên me yên digel hikûmetê de destûr ji Leyla xanimê re hat dan. Em hêvî dikin ko kesên dî yên wekî wê jî biçin.

Selahattin Demirtaş dibêje Ocalan ji Leyla Zanayê hêvî dike ko zêdetir xebatê ji bo prosesê bike û dibêje:

— Ocalan ji Leyla xanimê hêvî dike ko zêdetir destekê bide prosesê û ji bo wê yekê têbikoşe. Ji bo Zanayê got divêt tu arîkara wê yekê bî ko kurd zêdetir di nêv xwe de hevkariyê bikin û got divêt lêbixebitî ko rêxistinên kurdan ji bo pêkanîna Konferansa Neteweyî ya Kurdî pirtir xebatê bikin. Di nêvbera PKK-ê û PDK-ê de jixwe hevdîtin hene. Krîzên ko berdewam jî dikin hene. Heger em nekarin bibêjin “nakokiyên ji ber PYD-ê” bi temamî çareser bûn jî wekî berê dijwarî nemaye. Ji bo Leyla xanimê mîsyoneka taybet nehatiye diyar kirin ko xebatekê ji bo têkiliyên di nêvbera PKK û PDK-ê de bike. Jê têt hêvî kirin ko bi awayekê giştî rolekê ji bo yekîtiya kurdan bibîne. Giraniyeka Leyla xanimê jî heye.

Selahattin Demirtaş dibêje ew wekî kurdên Tirkiyeyê ji serokê Kurdistanê hêvî dikin ko:

— Nemaze zêdetir piştgiriya kurdên Sûriyeyê bêt kirin. Kurdên Tirkiyeyê hêvî dikin ko kurdên Sûriyeyê di konferansa Cenewreyê de bi hev re hereket bikin. Di vê arasteyê de divêt hikûmeta federal ya Kurdistanê bi awayekê resmî piştgiriya îdareya kurdî [ya li Sûriyeyê] bike. Divêt zêdetir xizmetê ji bo prosesa çareseriyê ya li Tirkiyeyê bikin. Divêt dema ko lazim be rexneyan li helwêstên AKP-ê bigirin. Em hîç rexneyan nabihîsin, zêdetir medhiyeyan dibihîsin. Kurd ji Barzanî siyaseteka ko zêdetir piştgir be hêvî dikin.

Li Tirkiyeyê hinek tirkên dewletçî van rojan medahiyê ji Leyla Zanayê re dikin û bawer dikin ko Leyla Zana dê bikare bi “sihra xwe” serokê Kurdistanê Mesûd Barzanî qane bike ko piştgiriya PYD-ê û îdareya wê ya li Kurdistana Sûriyeyê bike. Herwiha ew hêvî dikin ko Leyla Zana bikare serokê Kurdistanê ji bo amadekirina “Konferansa Neteweyî ya Kurdî” ya ko PKK dixwaze li gor xwe pêkbîne qane bike.

Akademîsyenê tirk Huseyin Yayman 28-ê vê mehê di rojnameya Vatanê de meqaleyeka dirêj li ser “superwomen” Leyla Zanayê nivîsiye û mirov dibêje qey di destê Leyla Zanayê de “Asayê Mûsa” heye û dikare behr û berrê şeq bike.

Huseyin Yayman di neh madeyan de wiha dinivîsîne:

1. Di hevdîtina [Ocalan û Zanayê] ya ko bi awayekî semîmî û hissî çêbû de mijara rojevê Sûriye û Rojava bû. Hat fêm kirin ko di nêvbera Ocalan û Zanayê de dozeka xwînî nîne.

2. Îdiayên ko “Leyla Zana ji BDP-ê cida ye” hilweşiyan.

3. Bi gehandina selama Barzanî bo Ocalan arîkariya daketina nakokiya ko dihat gotin di nêvbera Ocalan û Barzanî de heye kir. Zanayê rola nêvbeynçîtiyê di nêvbera BDP û PDK-ê û hikûmeta [AKP-ê] û PDK-ê de lehîst.

4. Wê ji destê yekê ji Ocalan re behsa xeternakiya minaqeşeyên di nêvbera PKK û PDK-ê de kir.

5. Ji bo daxistina tansiyona ko li ser statuya Rojava di nêvbera PKK-ê û PDK-ê de hebû zemîneka baş amade kir.

6. Hikûmeta [AKP-ê] bi destûrdana serdana Leyla Zanayê diyar kir ko di prosesê de xudanqerar e û dixwaze dest bi muzakereyan bike.

7. Serdana Zanayê arîkariya nûvekirina hêviyên ji bo prosesa çarerseriyê kir.

8. Hevdîtina Zanayê digel Ocalan piştî hevdîtina wê ya digel Erdogan nîşan da ko minaqeşeyên ko ev du sal bûn berdewam dikirin beyhûde bûn.

9. Ji bo pêkanîna Konferansa Neteweyî ya Kurdî ko ji ber problemên di nêvbera PKK-ê û PDK-ê de hatibû paşde dan hemfikiriyek peyda bû.

Mirov ji aqilê aqilmendên dewleta tirkan û ji aqilê aqilmendên PKK-ê gumanê dike. Bêyî ko ew siyaseta xwe biguhorin û bêyî ko PKK û Ocalan bên qunaxeka wisa ko serê xwe ji desthilata meşrû ya miletê kurd ya li başûrê Kurdistanê re bitewînin her carê bi hop-hop û halla-hallayê yeka wekî Leyla Zanayê didin pêş û bawer dikin ko dê bikarin serkirdayetiya siyasî ya başûrê Kurdistanê ji bo planên xwe qane bikin.

Hîç gotinek ji Leyla Zanayê re nîne. Ew kurdeka welatparêz e û dixwaze “qenciyekê” bike. Lê belê siyaset di esasê xwe de hewqasê “reel” û “konkret” e ko bi “hêviyan” û “qenciyê” nameşe.

Divêt berî hertiştî PKK û Ocalan bên qunaxeka wisa ko ji Beşar Esed, ji Recep Tayyip Erdogan, ji Hesen Rûhanî û ji Nûrî Malikî zêdetir guhê xwe bidin serokê Kurdistanê Mesûd Barzanî. Çi gava ko PKK-ê ev realîte qebûl kir dê qedrê mihaweleyên Leyla Zanayê jî hebe.

-----------------------------------

Nivîskar: LEWENDÊ BOTÎ
Weşandin: 2014-01-29
Xwendin: 7220