Nefel

[ SÊŞEM, 2024-04-16 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

fjrigjwwe9r1TabArticles:ArticleHeadline
fjrigjwwe9r0TabArticles:ArticleHeadline

STOCKHOLM, 26/12 2002 — Medyaya Tirkiyeyê cardî dest pê kiriye û xwe bi xwe digel xwe bazarê dike û tiştinan difiroşe xwe û tiştinan ji xwe dikire. Hem dibe bikir û hem dibe bifiroş. Çi dikire û çi difiroşe jî ne gelekê diyar e. Şer hatiye û li ber deriyê Tirkiyeyê rawestiyaye. Tirkiye bivênevê deriyê xwe ji Emerîkayê re vedike û vêca ji bo vê derîvekirina xwe hêcetan peyda dike.

Goya piştî ko wan deriyên xwe ji emerîkiyan re vekirine divêt li hemberî wê emerîkî destûrê bidin wan ko ew jî têkevin Kurdistanê. Goya Tirkiye dê nehêle ko ingilîz bikevin Kurdistanê. Goya Tirkiyeyê pêşniyar kiriye ko xetên sor li dora Kerkûk û Mûsilê bên kişandin û tenê hêzên emerîkî têkevin wan bajaran. Goya li gor raporeka dezenformasyonê ya isaîlî ya protirk (debka.net) kurd û tirk dê li hev bên û kurd dê rê bidin 70 000 eskerên tirk ko ew biçin Kerkûk û Mûsilê vegirin û li wê derê ji tirkmenan re federasyonekê çêkin û paşê tirkmen û kurdan li hev bînin.

Kurdên me jî fêrî vê qareqar û mejîreşkirina medyaya tirkan bûne û di bin tesîra wê de dimînin û dibêjin "wele Kerkûk û Mûsil" ji destê me çû. Dihesibînin ko kurd careka dî di nêv hesabên emerîkî û tirkan de bêbiha bûn û hindik maye li ber avê biçin.

Carekê rapora debka.netê ya ko dibêje Tirkiye dê bi 70 000 eskeran here Kerkûk û Mûsilê vegire û ji bo tirkmenan federasyonekê li wê derê çêke ji binî ve ti bingeh jê re nîne. Her mirovê ko zerreyek eqil di serî de mabe dizane ko ne xerb vê qebûl dike, ne kurd vê qebûl dikin û ne jî ereb vê qebûl dikin. Heger hemî kes qebûl bike jî kurd vê qebûl nakin û hêza kurdan tenê jî têrê dike ko nehêle rêya tirkan li Kerkûk û Mûsilê bikeve.

Tirkiye heyirî maye û nizane ka ew dê çawa bi zerereka herî kêm ji vî şerî xelas bibe. Ew dizane ko encama vî şerî dê her zerer be bo Tirkiyeyê lê belê cardî jî lêdixebite ko xusara xwe kêm bike. Vêca medyaya tirkî bi derew û dezenformasyonê meşrûiyetê ji derîvekirina xwe re peyda dike û ji hevwelatiyên xwe re hêcetekê nîşan dide û dibêje Tirkiye bikeve şerî çêtir e ji neketinê.

Tirkiye dikeve şerî nakeve şerî ew derdê Tirkiyeyê ye. Tirkiye deriyên xwe ji Emerîkayê re vedike venake ew jî derdê Tirkiyeyê ye. Lê belê rêya Tirkiyeyê li Mûsilê û Kerkûkê nakeve û ev jî derdê me kurdan e. Derdê me kurdan e ko em ji xwe bawer bin û bizanin ko em dikarin rê nedin tirkan ko ew bên û têkevin başûrê Kurdistanê. Derdê me kurdan e ko em bizanin ne emerîkî û ne ewropî û ne ti kes nikare pê li me bike û ti sebeb jî nîne ko pê li me bike û tirkan di Rojhilata-nêvê de xurt bikin.

Derdê me kurdan e ko em ji sekreterê giştî yê Yekîtiya Niştimanî ya Kurdistanê Celal Talebanî re bibêjin "her cara ko tu çûyî Tirkiyeyê dest bi xweşkirinê neke û nebêje ordiya tirkan dosta me ye û heger ew digel hêzên koalîsyona nêvneteweyî bên Kurdistanê zerer nake". Derdê me ye ko em bibêjin divêt tirk û hêzên tirkan bi ti awayî, ne bi serê xwe û ne jî digel hinekên dî, neyên başûrê Kurdistanê.

Ma çi ferq di nêvbera Tirkiye û Îran û Sûriyeyê de heye? Çima Tirkiye dê bikeve Kurdistanê û çima Îran û Sûriye dê nekevê? Hejmara şî’iyan li Iraqê dehqatî ya tirkmenan e û hejmara ereban jî dehqatî ya tirkmenan e. Îran û Sûriye jî dikarin bi hêceta şî‘î û ereban bibêjin ewê têkevin Iraqê û Kurdistanê. Derdê Tirkiyeyê ne tirkmen in. Em vê dizanin. Derdê Tirkiyeyê ew e ko kurd bi ser nekevin yan ne tirkmen di bin destên Sedamî de dimirin yan dimînin ew ne derdê Tirkiyeyê ye. Ma Iraq ji niho ve heye û ma tirkmen ji niho ve li Iraqê û Kurdistanê hene? Çima heta niho deng ji Tirkiyeyê nedihat?

Kurd çawa ko li hemberî Iraqê û Sedam Hisênî bûne yekdeng û yek helwêstê diyar dikin divêt her wisa li hemberî Tirkiyeyê û generalên wan jî bi yek dengî û bi yek helwêstê baxivin. Dema xweşkirinê derbas bûye û yê ko ji ordiya Tirkiyeyê re xweş dike jî heta niho ti feydeyê siyasî yan madî jê nedîtiye.

-----------------------------------

Nivîskar: ARIF ZÊREVAN
Weşandin: 2002-12-26
Xwendin: 4950