Nefel

[ SÊŞEM, 2024-04-16 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Hikûmeta Ak Partiyê gavekê û bîrokrasî sê gavan paş ve davêje

STENBOL, 18/1 2010 — Ji roja ko prosesa “rêlibervekirina kurdan” yan jî bi navê xwe yê nû “rêlibervekirina demokratîk” li Tirkiyeyê destpê kiriye û heta niho hikûmeta Ak Partiyê di bin êrişên CHP, MHP, esker, bîrokrasiya mihafezekar ya dewletê û DTP-a berê û PKK-ê de ye.

Bi gotina hevseroka DTP-ya berê Emine Aynayê CHP û MHP nikarin Ak Partiyê ji desthilatê bînin xwarê lê belê DTP, bi navê nû BDP, dikare wî karî bike. Rêberê PKK-ê Abdullah Ocalanî jî bi rêya eboqatên xwe got “bila kurd di hilbijartinan de Ak Partiyê bînin jêrê ji % 10-ê” yanî dengê xwe nedinê.

Hemî diyarde nîşan didin ko hikûmeta Ak Partiyê di warê maf û azadiyên giştî yên hemî hemwelatiyên Tirkiyeyê de dê gavên nû bavêje lê belê di warê çareserkirina pirsa doza miletê kurd de dê îsal ji gotinan zêdetir gavên konkret neavêje û bo nimûne zimanê kurdî wekî zimanê perwerdeyê dê nekeve dibistanan, ji ber neguhortina qanûna partiyên siyasî dê bi nasnameya kurdî partiyên siyasî yên kurdan neyên ava kirin.

Minaqeşeyên li ser prosesa rêlibervekirinê di medyayê de dê berdewam bikin lê belê dijwariya di nêvbera terefdarên BDP-ê û polîsê tirk de jî dê berdewam be û nemaze bi hatina biharê re mimkin e ko careka dî bajarên kurdan bibin qada pevçûnan û heta xwîn jî birije.

Bîrokrasiya dewleta Tirkiyeyê ev helwêsta nû ya hikûmeta Tirkiyeyê fêm kiriye û lewra ew hewayê pozîtîv ko li cem berpirsên hinek dezgehên dewletê hebû hêdî-hêdî negatîv dibe û heta ko ji bîrokrasiyê bêt karan asê dike û nahêle ko ev proses bi selametî bi rê ve biçe.

Yanî heger hikûmeta Ak Partiyê bi beyan û kirinên xwe gavek paş ve avêtibe bîrokrasiya mihafezekar sê gav paş ve avêtine û jiyana rojane jî ji bo hemwelatiyên sade û nemaze ji bo kurdan dibe ko bi qasî sala borî ne rihet be.

Di mizakereyên Tirkiyeyê û Yekîtiya Ewropayê de îsal gelek minaqeşeyên germ dê çêbin û divêt Tirkiye gelek qanûnên xwe biguhore û reforman berdewam bike. Yan dê hikûmeta Ak Partiyê bi piştgiriya Yekîtiya Ewropayê û Emerîkayê reforman bike û prosesa rêlibervekirina kurdan jî berdewam bike yan jî desthilata hikûmetê bi xwe dê bikeve xeterê de û ne dûr e ko hinek hêzên tarî hebanê bikin serê vê hikûmetê û ji desthilatê bi dûr xin.

-----------------------------------

Nivîskar: ARIF ZÊREVAN zerevan@nefel.com
Weşandin: 2010-01-18
Xwendin: 12373