Nefel

[ ÎNÊ, 2024-04-19 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

buy naltrexone without prescription
buy low dose naltrexone canada read
Li kufristana Kurdistanê rojnamevanên kafir nînin

STOCKHOLM, 8/1 2006 — Li kufristanê, yanî li Kurdistanê, rojnamevanên ko li hemberî desthilatdarên Kurdistanê bikarin û biwêrin bibin “kafir” û erka xwe ya rojnamevaniya tazîker, pirsker û rexnegir pêk bînin nînin. Sebebê vê yê esasî jî ne tenê rojnamevan bi xwe lê belê sîstema siyasî û îdarî ya Kurdistanê ye ji ber wê sîstemê teselluteka mitleq li ser medyaya kurdî û rojnamevanên kurd heye.

Medyaya kurdî medyayeka siyasî-hizbî ye û partiyên siyasî yan jî hikûmetên partiyên siyasî yên Kurdistanê xudanê hemî dezgehên medyayê ne û medyayeka ji partiyan azad û li hemberî partiyan bêminet û serbixwe nîne.

Sermayedarên Kurdistanê heta niho destê xwe neavêtine bazara medyayê û dewleta federal ya Kurdistanê jî heta niho nekariye mekanîzmayeka wisa ava bike ko bi awayekî arîkariya medyaya kurdî ya ji partiyan serbixwe bike û nehêle hikûmet û partiyên siyasî dîrekt xwe tevlî birêvebirin û nêveroka dezgehên medyaya kurdî bike.

Dewleta federal ya Kurdistanê dikare mekanîzmayekê ji bo arîkariya dezgehên medyaya kurdî dane û bi awayekî arîkariya wan bike bêyî ko hikûmet yan desthilatdarên siyasî bi mîzacê xwe yê şexsî xwe tevlî karê wan dezgehên ragihandinê bikin û di heman demê de divêt karê esasî yê wan dezgehên ragihandinê kontrol û lêpirsîn û jêpirsîna bikaranîna desthilata desthilatdaran be.

Heta niho jî partiyên siyasî yên Kurdistanê kîjan rojê bixwazin dikarin rojnameyeka kurdî, kanaleka televizyonê ya kurdî yan jî radyoyeka kurdî bigirin yan jî ji aliyê aborî ve wan rûbirûyê têkçûnê bikin û nehêlin ew bijîn.

Têkiliyên dethilatdarên Kurdistanê û birêveberên dezgehên medyaya Kurdistanê têkiliyên korrupt in û birêveberên dezgehên medyayê bi çend rêyan têne rişwet kirin: 1) Rişweta pêşiyê tayînkirina (damezirandina) wan birêveberan e li ser karên ko ew jê fêm nakin. 2) Rişweta didoyê têkiliyên xalûxuharzîtiyê yanî têkiliyên hevaltiyê ne û birêveberên dezgehên medyaya Kurdistanê ti caran pê li “hevalê xwe” nakin û rexneyekê li “hevalê xwe” yanî desthilatdarên siyasî nagirin. 3) Rişweta sêyê jî arîkariya madî ye û li Kurdistanê birêveberên dezgehên medyayê di konfor û xewneka nedîtî de dijîn.

Li Kurdistanê meaşê birêveberê dezgeheka medyayê dikare di resmiyatê de bi awayekê trajîkomîk 500 dolar be lê belê di realîteyê de pir zêdetir be ji ber xudanê dezgeha medyayê ji birêveberî re du-sê otomobîlan dikire, xanî dikire, meaşê şofêrên wî dide û bi minasebetên cida û wekî sulfe pereyekê zêde dide birêveberî. Bi vî awayî birêveber jî difikire ko meaşê wî 500 dolar e lê belê di realîteyê de dikare mehane bibe 10 000 dolar jî û çima ew dê xwe “kafir” bike û rexneyekê li desthilatdarên “hevalên xwe” bigire û malikê li xwe xera bike.

Birêveberên dezgehên medyaya Kurdistanê ji bilî rişweta madî ya dîrekt naxwazin berjewendiyên xwe yên dî jî bêxin xeterê de ji ber her yek ji wan berî her tiştî neh-deh xizmên xwe di ofîsa xwe û dezgeha xwe de didin xebitandin û heger ew ji karî bên avêtin xizm û mirovên wan jî dê ji karê xwe bibin.

Xerîb e, lê belê birêveberê her dezgeheka ragihandinê li Kurdistanê di hal û qewareyê xwe de împeretorek e û naxwaze wê împeretoriya xwe bêxe xeterê de. Min ofîs û odeyên serok û birêveberên dezgehên medyayên ewropî dîtine û odeyên wan ne ji odeyên peyamnêrekê yan karmendekê mezintir in.

Li Kurdistanê birêveberên dezgehên medyayê sê-çar odeyan yan jî qatekê sax ji avahiyekê li hev dixin û dikin odeya xwe ya karî. Mirovek çayciyê wan e, yek sekreterê wan e, yek dergevanê wan e, yek şofêr wan e, yek telefonciyê wan e, yek internetçiyê wan e ji ber ew nizanin Internetê jî bi kar bînin û yek posteciyê wan e. Yanî dezgeh û dinya hemî li dora birêveberê împeretor dizivire.

Çendrojekê berî hilbijartinên giştî li Iraqê û Kurdistanê serokê Kurdistanê Mesûd Barzanî digel berpirsên dezgehên medyaya Kurdistanê civiya û got bila rojnamevanên Kurdistanê rexneyan li sîstema îdarî û siyasî ya Kurdistanê bigirin û got rojnamevanek dikare hikûmetekê hilweşîne û kufr e ko rojnamevanek ji bo nivîsandinên xwe yan jî ji bo karê xwe li Kurdistanê bêt girtin ji ber armanca kurdan ji hemî têkoşîna miletê kurd avakirina welatekê azad bû û divêt rojnamevan jî azad bin.

Sîstema îdarî û siyasî ya Kurdistanê wisa kiriye ko di realîteyê de ti rojnamevan yan birêveberê dezgeheka medyaya Kurdistanê newêre xwe “kafir” bike û rexneyan li hikûmeta Kurdistanê û desthilatdarên Kurdistanê bigire ji ber desthilatdarên Kurdistanê bi mîzacê xwe yê şexsî û desthilata xwe ya siyasî û aborî dikarin Kurdistanê li rojnamevanan bikin kufristan.

Bi hêviya ko rojekê rojnamevan û birêveberên dezgehên medyaya kurdî bikarin bibin “kafir” û Kurdistanê ji kufristaniyetê rizgar kin.

Bila sala 2006-ê û hemî salên bên li we û hemî kes û karên we pîroz be.

-----------------------------------

Nivîskar: ARIF ZÊREVAN
Weşandin: 2006-01-08
Xwendin: 8020