KURDISTAN, 14/5 2006 — Programî karî serekwezîranî hikûmetî nwêy Kurdistan tenha destpêkî kar debêt. Xudî wutarekey serekwezîran seretay pirrosey destbekarkirdin debêt. Le mawey çend roj û hefte û mangî dahatû da em progirame, bêguman, gelêk qise û tiwêjînewe û hellsengandî le ser dekrêt le layen hawllatiyan û şarezayan û karmendanî hikûmetewe, çi le Kurdistan û çi le derewey Kurdistan (be Êraq û dirawsêkan û willatanî dostewe).
Wutarekey serekwezîran mercî serekî stratîjî hikûmetî serdemî tê da bû. Le wane amancî aşkiray karkirdin, giringîdanî pêwîst be hendêk kar le pêş karî dîke da. Le ser astî stratîjî dirêjixayen amancî serekî gelî Kurdistan rênimayî ew programe dekat be leberçawgirtinî standardî hukimrranî êsta û çawerriwanî ayînde, bellam bêferamoşkirdinî asteng û çiwarçêwey cêwpolîtîkî Kurdistan.
Le maweyekî kurt da hikûmetî nwê pêwîstî be wellamî hendêk pirsiyarî serekî debêt ta bitwanêt le çiwar sallî dahatû da erkî serekî xoy le cêbecêkirdinî pirogramekey serekwezîran da bibînêt. Egerçî wutarekey serekwezîran çiwarçêwey siyasetî serekî diyarî kird, çawerriwan dekrêt gişt wezîr û karmendekan le biwarî karkirdinî xoyan da program dabirrîjin bo beşdarî çalakane le piyadekirdinî siyasetî hikûmetî nwê da. Babetî serekî ser be her wezaretêk çî ye? Ew wezarete le karî xoy da êsta geyiştote kwê? Berew kwê deçêt? Le ayînde da deyewêt berew kwê biçêt? Çon degate ew amance?
Wek gişt hikûmetêkî serdem, her wezaretêk pêwîst e bizanêt kê debêt beşdarî le cêbecêkirdinî ew kare da bikat û çon? Bo ewey her wezaretêk bitwanêt nîşaney xoy bipêkêt û bigate encamî karêk ke bibête hoy asankarî bo berdewambûnî pirrosey hukimrranî, debêt xawen desellat û karmend le gişt astêk da birryar biden çi core mîkanîzmêk, çi core teknîkêk û çi core amêrêkî guncaw be kar bihênirêt.
Êsta katî ewe hatuwe bîrkirdinewey stratîjî bibête seretay têgeyiştin be birryar derbarey giriftî her wezaretêk, nwê ya kon. Le destpêk da debêt çiwar layenî karî dahatû baş destnîşan bikirên:
Layene behêzekan, lawazekan, helumercekanî berdest û herreşekanî êsta û ayînde. Bîrkirdinewey stratîjî lem core dekrêt bikirête berdî binaxey karî hikûmetî nwê le dewrî wutarî serekwezîran ke debête bernamey çiwar sallî hukûmetî ayîndey Kurdistan.
Dekrêt her wezaretêk û serekwezîran û cêgirekey pêkewe û be ciya le ser diyarkirdinî çiwar beşî em programe kar biken. Her layek beşêk le programekî hikûmet, ke peywendî be karî ewanewe hebêt, bigrête estoy xoy ta pêkewe hikûmet le kar û erkî da serkewêt. Paş ewe lêkolliynewe û lêtiwêjînewe bikirêt derbarey ew beşe.
Pirsiyarî serekî bo her layek ewe debêt ke çon deng û bas û miqo-miqo le bellgey amar û hellsengandinî dirust ciya dekenewe.
Karî giringî ew hellsengandine birîtî debêt le agadarkirdinewey wezîr û karbedestan derbarey rewşî ew erkey dekewêt ser şanî ewan.
Aya çareserî guncaw bo giriftane çîn ke dêne pêş cêbecê kirdinî peyam û xizmet û erkî ewan? Em core hellsengandine pêwîstiyan be lêkdanewey layenî abûrî, zanistî, komellayetî, amar, jînge, htd debêt. Bo serkewtin lem kare da her wezaretêk pêwîstî bewe debêt ke rêz le hellsengandin û boçûnî ew layenane bigrêt ke rastewxo peywendiyan be kar û xizmet û erkî ewanewe heye.
Eger, bo nimûne, lawan, xêzanî şehîdan û enfalkirawekan, eger cutiyaran ya xawen kar le kertî taybet da pirsiyan pêbikirêt pêş derkirindî yasayek, sepandinî birryarêk ya pêşkeşkirdinî xizmetêk boyan, gişt layek serkewtû debin. Hawllatiyan hest be beşdarîyekî dîmukrasî deken le prose siyaseke da, herwek serekwezîran le wutarekey xoy da basî kird, û wezaretekan hest be karasanî deken le pirrosey cêbecêkirdinî xizmet û sepandinî qanûn da.
Hîç yekêk lem karane da serkewtû nabêt eger be wirdî le sîstêmî geyandinî xizmet û berrêwebirdinî xoy nekollêtewe. Çend pare û tiwana serf bikirêt bo geyiştin beamanc, encamêkî baş bedest nahênirêt eger pêdaçûnewey berdewam nekirêt be sîstêmî kar raperrandin û tiwanay miroyî û berrêwebirdin. Emane hemû pêkewe detwanin bibine seretay despêkêk berew hikûmetêkî nwê le legell xwastî serkirdayetî Kurdistan biguncêt. |
