Nefel

[ ÎNÊ, 2024-04-26 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Bila Karayilan pêşiyê sewteriyên li dora xwe safî bike


	» Murat Karayilan

HEWLÊR, 6/7 2014 — Endamê komîteya birêvebir ya PKK-ê Murat Karayilan behsa "xetera DAIŞ-ê" li ser Kobanê û qetliamên mihtemel dike û ji bo arîkariyê bangî serokê Kurdistanê Mesûd Barzanî dike. Karê Murat Karayilan yê pêşiyê ew e ko kesên wekî Cemil Bayik, Salih Muslim, Hatip Dicle û medyaya PKK-ê ya dijmina miletê kurd rawestîne û bêdeng bike.

Piştî serhildana erebên sunî ya di bin kirasê DAIŞ-ê de hem li Iraqê û hem li Sûriyeyê rê li ber Îranê, Iraqa şîî û mitefiqa wan PKK-ê hat girtin. Li Iraqê hêdî Sunistan realîteyek e û îhtimala ko digel Sunistana Sûriyeyê jî bibe yek heye.

Vê realîteya jeopolîtîk agir xistiye binê avahiya dewleta Îranê, Iraqa şîî û mitefiqa wan PKK-ê. Lewra medyaya PKK-ê bi rêya Ozgur Gundemê buxtanên bêesas dixe stoyê Partiya Demokrat ya Kurdistanê û serokê wê Mesûd Barzanî û îdia dike ko PDK û Barzanî bi DAIŞ-ê re havkariyê dikin.

Li Sûriyeyê jî dema ko erebên sunî xurt bibin û Sumistanek çêbe rejîma Beşar Esed ya elewî dê li qeraxê deryaya spî asê bibe û hêdî rê ji hevkara wê rejîmê PKK-ê û PYD-ê re jî namîne.

Agirê ko girtiye desthilata Nûrî Malikî dê zû xwe bigihîne desthilata Beşar Esed jî û PKK û PYD dê ne li ber ti hesaban bin. PKK-ê ev xetera li ser xwe û PYD-ê fêm kiriye û lewra van rojan dike hawar-hawar û dibêje ko DAIŞ dê êrişî Kobanê bike.

***

Carekê divêt PKK û berpirsên wê baş bizanin ko ew bi xwe ji hemî siyaseta xwe ya xelet ya li Kurdistana Sûriyeyê berpirs in û wan Kurdistana Sûriyeyê aniye û li qunaxa têkçûnê asê kirine.

Murat Karayilan şerm nake û piştî sê salên desthilatdariya PKK-ê û PYD-ê li Kurdistana Sûriyeyê dibêje ko "îro problemên li Rojava ji PYD-ê û El-Partiyê gelek û gelek mezintir in" û daxwaza arîkariyê ji serokê Kurdistanê Mesûd Barzanî dike û dibêje:

— Nemaze banga min ji bo serokê herêma Kurdistanê rêzdar Mesûd Barzanî ev e: Îro problemên li rojava ji PYD-ê û El-Partiyê gelek û gelek mezintir in. Problema rojavayê hêdî problemeka neteweyî ye. Hêdî li wêderê pêwistî bi helwêsteka neteweyî heye. Heger sibe li Kobanê bi sedan yan bi hezaran kes bên kuştin dê wijdana me hemiyan biêşî. Ez bawer dikim ko dê wijdana we [Mesûd Barzanî] jî biêşî. Lewra divêt ambargoya li ser rojava bêt rakirin. Divêt ev astenga di nêvbera rojava û başûr de bêt rakirin. Divêt em xwdîtiyê li vî gelî bikin. Divêt hemî partî bi hev re kar bikin, bibin yek û bi hev re îdare bikin.

Roj baş Murat Karayilan! Roj baş PYD! Roj baş Cemîl Bayik! Roj baş Salih Muslim! Ka çend deqîqeyan li xwe û tarîxa xwe û pozîsyona ko hon îro ketinê temaşa bikin.

We bi xwe biryar da ko hon bibin mitefiqên rejîma Sûriyeyê, rejîma Îranê û rejîma Nûrî Malikî. We bi xwe biryar da ko hon li Kurdistana Sûriyeyê rê li ber hemî partiyên dî yên kurdan bigirin, ofîsê wan bigirin, berpirsên wan bikujin yan jî derxin û rêkin başûrê Kurdistanê.

Ev zêdetirî du salan e ko we bi xwe Kurdistana Sûriyeyê li miletê kurd kiriye cehenem û ji ber we 250 hezar kurd reviyan û hatin başûrê Kurdistanê û zêdetirî 100 hezar kurd revîn û çûn bakurê Kurdistanê û Tirkiyeyê.

Îro cih li we teng dibe û dibêjin ko nikarin Kurdistana Sûriyeyê li hemberî êrişên DAIŞ-ê biparêzin. Ma we kengê li kîjan parçeya Kurdistanê li hemberî kîjan dijminî kurd parastine heta ko hon Kobanê yan Qamişloyê biparêzin?

Îro li başûrê Kurdistanê firseteka dîrokî ji miletê kurd re derketiye û kurdan axa başûr hemî ji destê dijminên xwe derxistine û ji bo dewleteka neteweyî ya serbixwe kar dikin.

Belê Murat Karayilan. Kerem ke û li partiya xwe temaşa bike, kerem ke û li hevalên xwe temaşa bike, kerem ke û li kadroyên xwe û medyaya xwe temaşa bike.

Cemil Bayik dibêje PDK mitefiqa DAIŞ-ê ye û li dijî Barzanî derdikeve. Salih Muslim dibêje dewleta kurdî siyaseteka xelet e û li dijî Barzanî derdikeve. Hatip Dicle dibêje Kerkûk ne ya kurdan e û li dijî dewleta neteweyî ya kurdan û Barzanî derdikeve. Tew Ozgur Gundema te bi manşetên derew dixwaze kurdên bakur qane bike ko DAIŞ plana Barzanî û Emerîkayê û hinek welatan e û li dijî Barzanî û Kurdistana serbixwe derdikeve.

Belê Murat Karayilan, li rêberê xwe Abdullah Ocalan temaşa bike û paşê behsa parastina Kobanê û siyaseteka neteweyî bike. Rêberê te Abdullah Ocalan 26-ê meha borî ji kongreya HDP-ya tirkiyecî re mesaj rêkir û got ew hertim li dijî dewleta neteweyî ya kurdan e û got:

— Digel hemî astengîyên ko sîstema serdest li hemberî me derxist me paşde gav neavêt. Hêzên serdest [mesbest jê hikûmeta AKP-ê ye] yên ko hertim behsa "yekîtîya welat, milet û dewletê" dikin heta dawîyê piştgirîya cidabûna [kurdan] dikin û maskeya li ser rûyê xwe aşkera kirin. Herçend xwe wekî li dij nîşan dabin jî hertim wan piştgirîya kurdayetîyê kir. Heta wekî mîmarên dewletçîtiya-neteweyî ya kurdî kar dikin. Heroj xelekeka dî li lehîstoka xwe zêde kirin û îspat kirin ko cidaxwazên esasî ew bi xwe ne.

Yanî çi Murat Karayilan? Yanî Tirkiye bi hikûmeta Ak Partiyê hatiye qunaxa ko dewleta kurdî ya neteweyî qebûl bike lê belê rêberê te û partiya te li dijî dewleta serbixwe ya Kurdistanê ye. Brîtanya, Îsraîl, Fransa, Îtalya û gelek welatên ewropî hatine qunaxa ko Kurdistaneka serbixwe qebûl bikin lê belê partiya te bi gotin û kirênên xwe dijminahiya herî mezin bi Kurdistanê û miletê kurd re dike.

Kurdistaneka serbixwe qedera miletê kurd e û dê her ava bibe. PKK, KCK, PYD, Abdullah Ocalan, Cemîl Bayik, Hatip Dicle, Salih Muslim û hemî berpirsên wê şebekeyê îro di pozîsyoneka rûreş de ne û miletê kurd vê rûreşiya wan ji bîr nake.

-----------------------------------

Nivîskar: Nefel-Nûçe
Weşandin: 2014-07-06
Xwendin: 3548