Nefel

[ ÎNÊ, 2024-04-26 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Mustafa Ozçelîk: Pirsa kurdî ne ya dewletê û PKK-ê tenê ye

» Ozçelîk ji siyaseta dewletê û PKK-ê nerazî ye

DIYARBEKIR, 29/11 2014 — Serokê Partiya Azadiya Kurdistanê (PAK) Mustafa Ozçelîk duhî got heta niho hêj ne diyar e ka "prosesa çareseriyê" çi ye û got doza miletê kurd jî ne problemeka dewleta Tirkiyeyê û PKK-ê tenê lê belê problema dewletê û hemî gelê Kurdistanê ye.

Li gor Hurhaberê, serokê PAK-ê Mustafa Ozçelîk behsa prosesa çareseriyê ya li Tirkiyeyê û bakurê Kurdistanê kir û got:

— Heta niho nehatiye pênase kirin ka [dewlet û PKK] dê çi çareser bikin. Ji bo çareserkirina pirsa kurdî û pirsa Kurdistanê ti program nehatine diyar kirin. Helwêst û pêşniyarên dewletê nemaze li dor bêsîlehkirina PKK-ê kilît bûye. Heger dewlet meseleyê bi vî awayî fêm bike û tenê bixwaze wî qismî çareser bike xeletiyeka pir cidî dike û dê mixabin be.

— Problem ne tenê ya dewletê û PKK-ê ye. Problem ya dewletê û hemî gelê Kurdistanê ye. Lewra jî em dibêjin divêt dezgeheka hevbeş ya hemî gelê Kurdistanê bi hemî grupên etnîkî, dînî, mezhebî, civakî, neteweyî û siyasî ve pêk bêt û dewlet wekî muxateb bi wê dezgeha hevbeş re danûstandinan bike.

Mustafa Ozçelîk got ew wekî partî li dijî hemî metodên şidetê ne û di xebata xwe ya siyasî de jî dê rê û rêbazên sivîl, demokratîk û meşrû bi kar bînin û di heqê doza miletê kurd de got:

— PAK berî hertiştî bi pênasekirina hebûna miletê kurd û hebûna welatekî bi navê Kurdistanê siyasetê dike. Em dibêjin ko musteleha "miletê tirk" behsa me kurdan nake û Tirkiye jî ne "yek welat û wetenê hevbeş" yê me ye. Em dibêjin ko Kurdistan û Tirkiye welatên cuda ne. Bi vê ve girêdayî mustelehên tawanbarkar yên wekî "cudaxwaz" û "parçexwaz" mustelehên wisa ne ko hebûna me înkar dikin û wekî emrazên "uniter" yên dewleta Tirkiyeyê li hemberî me tên bi kar anîn. Em lênaxebitin ko welatê hîç kesekî parçe bikin. Bi zorê dest danîne ser îradeya me û em dibêjin "em hîç demekî nebûn yek heta ko cuda bibin". Wekî ewladên milet û welatekê ko bi zorê dest bi ser azadiya wan de hatiye girtin em dixwazin ko em em bin û ne tikesê dî bin.

Partiya Azadiya Kurdistanê ji bo bakurê Kurdistanê mafê serxwebûnê jî tê de daxwaza kiyanekê siyasî yê federal yan otonom digel Tirkiyeyê dike û heger Tirkiye wê qebûl neke daxwaza serxwebûnê dike. Mustafa Ozçelîk di heqê daxwazên siyasî yên PAK-ê de got:

— Dema ko em dibêjin em dikarin ji tecrubeya dewleta federal ya li başûrê Kurdistanê wekî nimûne îstifadeyê bibînin mebesta me diyar e. Heger dewleta Tirkiyeyê bi israr welatê me, miletê me û şirîkatiya me ya wekhev qebûl neke em jî têkiliyeka ne bi vî rengî be qebûl nakin û dikarin mafê xwe yê dewleteka cuda yan konfederal bi kar bînin.

-----------------------------------

Nivîskar: Nefel-Nûçe
Weşandin: 2014-11-29
Xwendin: 1764