Nefel

[ ÎNÊ, 2024-04-26 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Dengîr Mîr Mehmet Firat: Rûyê Erdogan hebe bila bêt dîlana me kurdan


	» Dengîr Mîr Mehmet Firat

ENQERE, 28/1 2015 — Siyasetmedarê kurd Dengîr Mîr Mehmet Firat îro bi rêya facebooka xwe daxuyaniyeka nivîskî belav kir û hetk û helaka serokkomarê Tirkiyeyê Recep Tayyîp Erdogan bir.

Dengîr Mîr Mehmet Firat rexneyên gelek dijwar li hevalê xwe yê berê serokê Ak Patiyê û serokkomarê niho Recep Tayyîp Erdogan girt û got Erdogan dia dikir ko Kobanê bikeve da reqsa tirkî "çîftetelliyê" bilehîze.

Dengîr Mîr Mehmet Firat got kurdan ev hewesa Erdogan di dilê wî de hişt û niho ji bo rizgarkirina Kobanê dîlanê dikin û got heger rûyê Erdogan hebe bila bêt û digel kurdan dîlanê bike.

Teksta daxuyaniya Dengîr Mîr Mehmet Firat bi kurdî li jêrê ye.

***

Rêzdar serokkomar Recep Tayyip Erdogan li qesra xwe ji bo muxtarên ko ji Anadoluya-nêvê hatibûn axaftineka ko helwêsta wî ya jidil nîşan dide kiriye û bi zimanekê tinazker gotiye ew fêm nake çima kurd [ji bo rizgarkirina Kobanê] reqsa "çîftetellî" dikin.

Welatê kurdan piştî şerê cîhanê yê yekê di nêvbera çar dewletan de hat parve kirin. Kurd ji bo rizgarkirina Kobanê ji destê wehşeta Daişê bûn yek dil û yek beden û bi sedan mirovên xwe feda kirin.

Berî hertiştî divêt ez bînim bîra rêzdar Erdogan ko navê wê lehîstoka kurd dilehîzin ne "çîftetellî" ye. Navê wê "dîlan" e û mirov bi destêhevdugirtinê ko sembola yekîtiyê ye dilehîze.

Û paşê divêt vê yekê ji wî bipirsim: Dema ko Daişê li Kobanê bi sîlehên giran û bi awayekê hovane êrişî kurdan kir şona ko ew li hawara kurdên ko ew dibêje "brayên min in" biçe rabî û got "gelek nemaye, hema nêzîk dê Kobanê bikeve". Gelo ev gotinên wî ne "çîftetellî" bû ko wî dilehîst?

Bêguman ne mimkin e em miletê kurd yê ko bextewariya miletan, azadî, demokratbûn û însaniyet kiriye armanca xwe û li hemberî çeteyên Daişa paşvero û xeddar welatê xwe diparêze û [Erdoganê] ko derket pêşberî xelkê û ji bo ketina wî bajarî bi gotina "Kobanê hindik maye ko bikeve" kêfxweşiya xwe diyar kir û got hîç ferq di nêbera sembola wehşetê çeteyên Daişê û kurdên ko welatê xwe diparêzin de nîne muqayese bike. Bêguman em ji bîr nakin ko ev kêfxweşiya [Erdogan] nîşana zîhniyet û hestên wî ye û nikare li hemberî kurdan veşêre jî herçend beşeka mezin ji hemwelatiyên vî welatî kurd in.

Miletê kurd ev axa ko bi hezaran salan e li ser dijît wekî welatê xwe îhtiwa kiriye. Vî miletî [wekî tirkan] ji cihekî barnekriye û nehatiye vêderê. Ji roja ko heye ve li ser vê cografyayê jiyaye.

Ji hinekan re gelek zehmet e ko vê rewşê û vê hestê fêm bikin û mirov nikare li wan bide fêm kirin jî.

Ew Kobanêya ko ji bo hinekan gelek biçûk û bêqîmet e ŞEREF, NAMÛS û WELATÊ miletê kurd e û ji bo xatirê rizgarkirina wê kurd yek lehzeyê jî dudiliyê di şehîdbûnê de nakin.

Wekî li gelek cihên dî ew navçeya biçûk jî bû sebeba ko kurd wekî yek MILET di serbilindî, êş û bextewariyê de bi şirîkatiya hevdu bihesin.

Ew kesên ko midaxeleyî wê wehşeta ko bi çavên vekirî ji tixûbê vî welatî dihat dîtin nekirin, di heman demê lêxebitîn ko rê li ber arîkariya cîhana azad jî bigirin û di rojên herî teng de rênedan ko balafirên şerî ji Încîrlîkê bifirin û hêzên koalîsyonê mecbûr kirin ko ji xelîca Erebî bi astengiyên sotemeniyê operasyonê bikin.

Dema ko hikûmeta federal ya Kurdistana Iraqê û gelê êzdî rûbirûyê êrişê bûn û felaketên însanî çêbûn jî Tirkiyeyê guhê xwe neda daxwaza wan ya arîkariyê û tabura tankan û eskerên Tirkiyeyê li ser tixûb tenê temaşevan bûn.

Wekî ko rêzdar serokkomar jî pêhesiyaye û diyar kiriye, miletê kurd û cîhana azad bêguman bi vê encama rizgarkirina Kobanê bextewar e.

Ji wê yekê qet gumana min nîne ko heger hovên Daişê wekî wî gotî Kobanê bixistina bin kontrola xwe de niho hinekan [yanî Erdogan] dê "çîftetellîya" bi çardestî bilehîsta.

Bila li qusûra me nenêrin, berxwedana Kobanê yanî bi gotineka dî berxwedana şerefmend ya kurdan û zefera ko di encama wê de bi dest xistin bû sebeba ko Erdogan ji lehîstina "çîftetellîyê" mehrûm bimîne.

Piştî hewqes daxuyaniyên wî yên di heqê Kobanê de heger ew bixwaze û hêjî rûyê wî hebe dikare bêt û tevlî dîlana me kurdan bibe.

Enqere, 28/1 2015

Dengîr Mîr Mehmet Firat

-----------------------------------

Nivîskar: Nefel-Nûçe
Weşandin: 2015-01-28
Xwendin: 1997