Nefel

[ ÎNÊ, 2024-04-26 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NÛÇE

Îhtimal heye ko Emerîka Salih Muslim vexwîne Washingtonê


	» Salih Muslim

STENBOL, 28/9 2015 — Rojnamevana emerîkî-tirk Amberîn Zaman di nivîsareka xwe de (25/9) behsa rola kurdan di Sûriyeya îro de dike û dibêje Brett McGurkê berpirsê dosyaya Îranê û Iraqê dosyaya Sûriyeyê jî xistiye destê xwe û bi îhtimaleka pir mezin di demekê nêzîk de Emerîka dê hevserokê PYD-ê Salih Muslim vexwîne Washingtonê.

Amberîn Zaman di heqê Brett McGurk de dibêje:

— Berevajî wezîrê bergiriyê Ashton Carter, Brett McGurk bi germî li hevkariya digel Tirkiyeyê temaşa dike û hemfikiriyeka xurt di nêvbera wî û wezîrê derve yê Tirkiyeyê Ferîdun Sînîrlîoglu de heye. Û di heman demê de piştgiriya YPG-ê jî dike. Ew, Tirkiyeyê û kurdan wekî alternatîvên hevdu nabîne. Ji ber sebebên bîrokratîk yên klasîk destê xwe avêt dosyaya PYD-ê ya maseya Sûriyeyê jî. Di demekê gelek nêzîk de îhtimal heye ko Salih Muslim bêt Washingtonê.

Amberîn Zaman dibêje aciziya Tirkiyeyê ya ji kurdan û YPG-ê ji nefreta Erdogan ya ji Beşar Esed gelek zêdetir e û ne belî ye ka Tirkiye dê di netîceyê de helwêsteka çawa nîşan bide û dibêje:

— Lê belê em hemî dizanin sebebê ko Tirkiyeyê dergehê Încîrlîkê vekir rêlibergirtina kurdan bû ji ber paranoyaya dewletê ya li hemberî kurdan ji nefreta Erdogan ya li hemberî Esed gelekê zêdetir e. Jixwe piştî hingê Emerîkayê lempeya sor ji bo YPG-ê pêxist da di aliyê Cerablusê de pêşde neçe. Bêyî desteka hewayî ya Dewletên Yekgirtî yên Emerîkayê wisa xuya dike ko YPG nikare bi aliyê rojavayê çemê Firatê ve pêşde biçe. Astengiyeka dî ya YPG-ê jî ev e: Ji bo ko bikare li hemberî Daişê xudantesîr be û tifaqa xwe ya digel Emerîkayê pêşde bibe pêwistiya wê bi sîlehên giran heye.

— Serokê îdareya herêma Kurdistana Iraqê Mesûd Barzanî heta YPG rênede ko pêşmergeyên rojava yên ko wî bixwe perwerde kirine derbasî Sûriyeyê bibin ew rênade ko di ser Kurdistana Iraqê re sîleh bên rêkirin bo YPG-ê. Digel nêvbeykariya McGurk problem nehat çareser kirin. Mesderên kurdên Sûrî îdia dikin ko Tirkiye rênumayan dide Barzanî.

Paşê jî Amberîn Zaman bêyî ko navê kesekî bide bi îhtimaleka gelek mezin ji devê Salih Muslim behsa pêşmergeyên rojava dike û dibêje:

— Berpirsekê bilind yê kurdên Sûriyeyê ji Dîkenê re [malpera ko Amberîn Zaman tê de dinivîsîne] wiha behsa torebûna xwe kir: "Ew zelamên ko Barzanî dixwaze têxe [Rojavayê Kurdistanê] kesên wisa ne ko ji herêma me bazdane û tevlî tawanan bûne. Wekî hêzên taybet hatine perwerde kirin û mehê 500 heta 700 dolaran werdigirin, lê belê [gerîlayên] me bi heqê şorba nîskê û fasûlyeyan şerî dikin. Heger ew bên dê hemî balansa heyî têkbidin. Ew qebûl nakin ko di bin fermana qumandarên me de bin. Ya ko ew dixwazin şerê nêvxweyî ye û lawazkirina rojava ye.

Di dawiya nivîsara xwe de Amberîn Zaman dibêje kilîla meseleyê di destê Tirkiyeyê de ye û dibêje:

— Kilîl di destê Tirkiyeyê de ye. Û li pêşiya wê du alternatîv hene: Yan dê rêlibergirtina kurdan wekî şertekê destpêkê [ji bo hevkariya digel Emerîkayê] dane ber Emerîkayê yan jî dê destê xwe dirêjî kurdên Sûriyeyê bike. Alternatîva didoyê bi her awayî ji bo hemî aliyan qazanc e. Bi wê rêyê nakokiya digel Emerîkayê dê dakeve asteka mînîmum û li hemberî Daişa ko ji hemî kesê zêdetir li ser Tirkiyeyê tehdîd e cepheyeka saxlem ava bibe. Û ji hemiyê giringtir prosesa çareseriyê ya [digel PKK-ê] dê cardî zindî bibe. Vêca heger Tirkiye îsrarê li ser alternatîva yekê bike ko xuya dike dê wisa bike ya ko herî zêde bixusire jî dê her Tirkiye be.

-----------------------------------

Nivîskar: Nefel-Nûçe
Weşandin: 2015-09-28
Xwendin: 3237