Nefel

[ PÊNCŞEM, 2024-04-25 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

NIVÎSAR

Bakurê Kurdistanê li rêberekê wekî Mesûd Barzanî digere

DIYARBEKIR, 18/8 2015 — Rola rêberan di dîroka miletan de hewqasê mezin e ko carinan hinek milet li xwe heyirî dimînin û mecbûr dibin ko ji welatekê dî rêberekî bo xwe peyda bikin.

Di destpêka sedsala 18-ê de miletê Swêdê jî li xwe heyirî mabû û nedikarî melikekî ji xwe re peyda bike. Swêd ji bêçaretiyê mecbûr bû ko ji Fransayê, Karl XIV Johan bîne û bike melikê xwe. Karl XIV Johan sala 1763-yê li Fransayê hatibû dinyayê û di nêvbera sala 1818 û 1844-ê de tam 26 salan hikimdariya Swêdê kir.

Îro li parçeya herî mezin ya Kurdistanê li bakur miletê kurd li rêberekê wekî Mesûd Barzanî digere da li ser bingehê axa Kurdistanê û miletê kurd rêberiya avakirina dewleteka niştimanî ya kurdî bike.

Gelek mixabin li bakur miletê kurd tûşî rêberiya Ocalanekê hevkar û xizmetkarê dewleta tirkan bûye û kurd nizanin çi bikin û di destê şidetperestên wekî Cemil Bayik û "tirkiyeciyên" wekî HDP-ê de rêya xwe şaş kirine û hertim dibin kartên lehîstoka rêxistina îstixbaratê ya Tirkiyeyê yan îstixbarata welatekê wekî Îranê û Sûriyeyê.

Li başûrê Kurdistanê familyeya barzaniyan ev zêdetirî sed salan e xizmeta doza miletê kurd dike. Serokê Kurdistanê Mesûd Barzanî bi karîzmaya xwe, bi sebra xwe, bi dîroka xwe, bi sedaqeta xwe ya digel miletê kurd, bi hekîmiya xwe û bi rêberiya xwe xizmeteka gelek mezin ji bo miletê kurd li başûrê Kurdistanê dike û divêt em aşkera bibêjin ko niho ti bedîlên wî nînin.

Gelek mixabin e ko hinek hêzên siyasî yên başûrê Kurdistanê nemaze ew hêzên ko cemawerê wan soran in li ser esasê herêmperestiya xwe ya li Silêmaniyê dijminahiya şexsê Mesûd Barzanî û familyeya wî dikin û di vê rê de amade ne ko başûrê Kurdistanê parçe bikin yan jî ji qunaxa serxwebûnê vegerînin. Derdê wan hêdî ne avakirina Kurdistaneka serbixwe li başûrê Kurdistanê lê belê parastina herêmoka wan e.

Ez bi xwe gelek caran difikirim aya heger em kirmanc û kurdên bakur familyeya barzaniyan ji soranan paşde bistînin dê ne baştir be. Bi qenaeta min heger familyeya barzaniyan û nemaze serok Barzanî dest ji rêbertiya soranan berde û rêbertiya kurdên bakur bike dê zûtir bikare Kurdistaneka serbixwe ava bike. Çi dema ko bakurê Kurdistanê serbixwe bibe kontrolkirina wîlayeta Silêmaniyê jî dê gelek hêsanîtir bibe.

Heger Mesûd Barzanî rojekê ji vê rikeberiya bêwate biweste û dest ji serokatiya Kurdistanê berde yên ko herî zêde bixusirin bêguman berî hemî kesî soran in û ew hêzên dijminên Barzanî ne.

Partiyên siyasî yên ko bingeha wan soran in û rêberên wan soran in ti deman ne mimkin e ko bikarin hikimdariyê li Akrê jî bikin. Lê belê Barzanî bi cemawerê xwe yê kurd û kirmanc yê li başûr û bakur dikare rêberiya hemî miletê kurd li hemî parçeyên Kurdistanê bike.

Wisa xuya dike ko divêt miletê kurd û nemaze kurdên bakur wekî Swêdê bikin û ji xwe re rêberekî ji parçeyeka dî ya Kurdistanê bînin. Şansa kurdan ji ya swêdiyan baştir e ji ber kurd dê rêberekî ji parçeyeka dî ya Kurdistanê bînin û ne ji welatek û miletekê dî.

Dem hatiye. Divêt Barzanî rêberiya bakurê Kurdistanê bike.

-----------------------------------

Nivîskar: ARIF ZÊREVAN zerevan@nefel.com
Weşandin: 2015-08-18
Xwendin: 24811