Nefel

[ ÎNÊ, 2024-04-26 ] [ BIKE MALPERA DESTPÊKÊ ] [ BÊXE NÊV BIJAREYAN ] [ KONTAKT ] [ INFO ] [ LÊGERÎN & ARŞÎV ]

DESTPÊK

	Nûçe

	Nivîsar

	Kulturmagazîn

	Hevpeyvîn

	Kolumnîst

	Ewrokurd

	E-Pirtûk

	Lîteratûr

	Ziman

	Muzîk

	Foto

	Lînk

E-POSTEYA TE

	Nav (Username)



	Şîfre (Password)





	»E-posteyeka nû bo xwe qeyd bike

REKLAM

KOLUMNÎST

Xetera hilbijartinên mehelî li bakur û başûrê Kurdistanê

STOCKHOLM, 2/12 2008 — Di destpêka sala 2009-ê de hem li bakurê Kurdistanê û hem li başûrê Kurdistanê partiyên kurdan û partiyên miletên serdest dê rûbirûyê hev bibin û xeter heye ko kurd ji berê zeîftir bibin.

Li hinek deverên başûrê Kurdistanê û Iraqê di taliya meha yekê de hilbijartinên meclisên wîlayetan dê bêne kirin. Hersê wîlayetên başûr Hewlêr, Silêmanî û Dihok ne di xeterê de ne ji ber ew bi tixûbên federasyona Kurdistanê têne parastin. Qedera Kerkûkê ne diyar e. Hilbijartina meclisa wîlayeta Kerkûkê dê paşê bêt kirin.

Li başûr di nêvbera kurdan û ereban de şerê herî mezin dê li wîlayeta Mûsilê çêbe û zehmet e ko kurd bikarin pozîsyona xwe ya berê biparêzin û piraniya endamên meclisa wîlayeta Mûsilê û walîtiyê bi destê xwe ve bînin.

Sala 2005-ê erebên sinî hilbijartin boykot kirin û lewra lîsteya kurdan bi ser ket. Waliyê Mûsilê herçend ereb jî be ew ji lîsteya kurdan hatiye hilbijartin û meclisa wîlayetê jî di destê lîsteya kurdan de ye. Cihgirê waliyê Mûsilê Xesro Goranî heta du sal berê jî digot “gunê walî di destê kurdan de ye” û kurd li Mûsilê çi bixwazin dikarin bikin.

Îro rewş hatiye guhortin. Teror li Mûsilê kêm bûye, erebên sinî organîze bûne û dixwazin bi xurtî beşdarî hilbijartinên meclisa wîlayeta Mûsilê bibin. Kurd ditirsin ko erebên sinî bi tehdîd û tuhmetan kurdan li Mûsilê lawaz bikin û heta nehêlin ko kurd li gor nifûsa xwe ya li Mûsilê jî di meclisa wîlayetê de bên temsîl kirin.

Heger ereb bikarin di meha yekê de li Mûsilê kurdan pir lawaz bikin dê paşê di hilbijartina meclisa wîlayeta Kerkûkê ya tarîxnediyar de jî kurdan lawaz bikin û nehêlin piraniya kursiyên meclisa wîlayetê di destê kurdan de bimînin.

***

Li bakurê Kurdistanê û Tirkiyeyê jî 29-ê adara 2009-ê hilbijartinên serokatiya belediyeyan dê bêne kirin û partiya desthilatdar AKP-ê berê xwe daye keleha DTP-ê Diyarbekirê û dixwaze jê bistîne. Ev şer û xirûcira ko van demên dawiyê di nêvbera AKP-ê û DTP-ê de çêdibe û dê heta taliya adarê berdewam bike ji bo serokatiya belediyeyên bajarên Kurdistanê ye.

AKP îmkanên dewleta tirkan û waliyên li Kurdistanê jî wekî aktîvîstên xwe bi kar tîne û heroj planên nû amade dike da DTP-ê têkbibe. Bo nimûne waliyê Diyarbekirê biryar daye ko 100 000 familyeyên ko rewşa wan ya aborî ne pir baş e tesbît bike û di meha yekê û didoyê ya sala bêt de yanî berî hilbijartinan dê arîkariya madî bide wan familyeyan da ew jî dengê xwe bidin AKP-ê.

Partiya AKP-ê bi bername û program xebateka organîzekirî dike û gelek rêxistinên sivîl yên li Diyarbekirê ji bo biserketina AKP-ê kar dikin. Partiya AKP-ê ne tenê li Diyarbekirê lê belê li Şirnexê û Dêrsimê jî dixwaze serokatiya belediyeyê ji DTP-ê bistîne. Jixwe her ji berê de piraniya belediyeyên bajarên Kurdistanê di destê AKP-ê de ne.

DTP-ya ko navê kurdan li ser e û Ewropa û Emerîka jî wê wekî partiyeka kurdî dihesibînin di propagandaya xwe ya hilbijartinan de xwe dispêre piştgiriya rêberê PKK-ê Abdullah Ocalanî û di hemî minasebetan de behsa “azadiya wî, îradeya wî, psîkolojiya wî û fîzîka wî” dike û hêvî dike ko Abdullah Ocalan dê DTP-ê bi ser bixe.

Lê belê çawa ko di hilbijartinên giştî yên sala 2007-ê û yên berî wê de avakerê dewleta tirkan Mustafa Kemal Ataturkî nekarî têra biserketina partiyên nijadperest yên wekî CHP-ê û MHP-ê bike, wisa jî di hilbijartinên bên de rêberê PKK-ê Abdullah Ocalan dibe ko têra biserketina DTP-ê neke.

Kurdên bakur heta hetayê bi gotinên îdeolojîk û nemaze bi îdiayên wekî “jehrdayin, porjêkirin û zordariya fîzîkî” ya li hemberî rêberê PKK-ê Abdullah Ocalanî naxapin û têr nabin.

Heger DTP ji bilî projeyên li dor jiyana Abdullah Ocalanî, ji xelkê kurd re projeyên nû û konkret pêşkêş neke û diyar neke ka siyaseta wê ya doza neteweyî çi ye hingê kurd dê baweriya xwe pê neînin û bibêjin ji aliyê pirsa kurdî ve ti ferq di nêvbera DTP-ê û AKP-ê de nîne û dengê xwe bidin AKP-ê.

***

Têbînî: Ev nivîsar bi soranî di rojnameya Rûdawê de li Hewlêrê û bi kirmancî jî di sîteya Nefelê û sîteya Rûdawê de têt weşandin.

-----------------------------------

Nivîskar: ARIF ZÊREVAN zerevan@nefel.com
Weşandin: 2008-12-02
Xwendin: 9274