STENBÛL, 29/4 2009 — Helîm Yûsivî di nivîsa xwe ya di Diyarnameyê de ko bi navê ”Derdên nivîskariya kurdî - 2” de qala çûyina mina TRT 6ê û neçûyina Roj TVyê kiriye û weha dibêje:
”Hinek nivîskarên kurd, ji ber prensîpên xwe yên siyasî, nayên Roj TV. Ew jî mafê wan e. Ji wanên ko min ew vexwendin bernama xwe û nehatin nivîskarên mîna Hesenê Metê, Silêman Demir û Enwer Karahan…hene, wekî mînak, Enwer Karahan, berî demeke kin, mêvanê TRT 6’ê bû. Pirsa min jî ew bû, eger mesele prensîp bin, çima ew prensîp ji bo Roj TV hene û ji bo TRT 6 tune ne?”
Ez ê bi Helîm Yûsivî re minaqaşeya prensîpên xwe yên siyasî nekim. Helbet sebebên neçûyina min a Roj TVyê hene û mihatabê wan pirsan jî ne Helîm Yûsiv e, lê divê şaşiyek ji orteyê rabe ko min ji Helîm Yûsivî re qala prensîpên xwe yên siyasî nekirine ko ez ji ber wan sedeman neçûme programa wî. Wî li ser hesabê xwe ew tişt gotine; e-maila ko wî ji min re şandiye û bersiva min li jêr e. Ka hûn jî ji kerema xwe re lê binerin, bê min çi sedem nîşan dane ko ez nikarim herim programa wî.
***
From: halim yusiv
To: enwerkarahan@hotmail.com
Sent: Saturday, September 22, 2007 9:25 PM
Subject: silavek û pirsek
Êvar baş kekê E.Karahan,
Bernama G.sêyemîn berê li Wuppertalê û niha li nêzîkî Brukselê tê tomarkirin.Min dixwest tu carekê bibî mêvanê bernamê.
Eger bi dilê te be, em dikarin li ser meh û rojê piştre li hev bikin.
Du pirtûkên te, şevbihêrkên şevên tarî û duaya êvarê li ba min hene.
Ez ê kêfxweş bibim ko berhemên mayî jî ji min re bêne şandin.
Jixwe eger li ba te hebin.
Ez li hêviya bersiva te me.
Ligel rêz û silavan.
H.Yûsiv
***
From: enwerkarahan@hotmail.com
To: halimyusiv@hotmail.com
Subject: Re: silavek û pirsek
Date: Mon, 24 Sep 2007 13:02:08 +0200
Merheba kek Helîm,
Ez dixwazim berî hertştî ji ber vê nezaket û daweta te ya nazik, sipasî te bikim ko ez di bîra te de hatime û tu min dawetî programa xwe dikî.
Li hemberî te û programa te tu helwêst û pêşhumiyeke min tune ye û ji dilpakiya te jî tu şika min tune ye, divê tu weha zanibî.
Loma jî dixwazim bibêjim, vê gavê şertên ko ez bikarim beşdarî programeke TVyê bibim, tune ye. Heger di pêş de şerd ava bûn, ez dikarim bi kêfxweşî bibim mêvanê te û qahweyeke te
vexwim.
Heger tu navnîşana xwe ji min re bişînî, ez dikarin herdu kitêbên ko li ba te tune ne, ji te re bişînim. Ya rastî, min ji bona te ”ÇÛ” anîbû Kurdistanê, lê wexta em vegeriyan, min tu nedîtî ko ez bidim te.
Bi silavên dostaniyê...
Enwer Karahan |
